Júlio Hornai: Lei arma branka admite kaptura GAM treinu iha kalan

Komandante Jerál Polísia Nasionál Timor-Leste (PNTL), Júlio Hornay,  hateten,  operasaun ba Grupu Arte Marsiál (GAM) ne’ebé mak Governu taka ona hanesan Persaudaran Setia Hati Terate (PSHT) Ikatan Kera Sakti, no Kmanek Oan Rai Klaran (KORK) kontinua la’o, bazeia ba lei arma branka.

“Desde  que lei númeru 5/2017 armas brankas seidauk  iha mudansa ruma, ami kontinua ezekuta lei refere hodi buka tuir atividade GAM  ne’ebé mak treinu iha kalan atu kaptura submete ba prosesu justisa”,esplika Komandante Jerál PNTL Komisariu  Júlio Hornay, ba jornalista sira Tersa (26/02/19) iha Sentru Formasaun Polísia Comoro, Díli.

Entretantu rezolusaun Governu númeru 16/2013, bandu total Grupu Arte Marsiál hanesan Ikatan Kera Sakti, Persaudaran Setia Hati Terate (PSHT) no Kmanek Oan Rai Klaran (KORK), atu labele ezisti iha nasaun ne’e. Maske nune’e ho lei refere ema kontinua halo problema iha bairu sira ema kaer sasan kroat hanesan rama ambon  hodi hana komunidade la’o iha tempu kalan, no ema kaer  katana ka samurai hodi tá kanek ema seluk no hasai ema seluk nia vida. Tanba  ne’e, Governu hamosu tan lei  númeru 5/2017 armas brankas hodi bandu ema kaer sasan kroat no hala’o atividade GAM.avi