PNTL husu Governu autoriza halo operasaun ba GAM ■Julio Hornay:Arte marsiál labele domina TL

Komando Jerál Polísia Nasionál Timor-Leste (PNTL) hato’o ona karta ba Governu atu husu autorizasaun ba Governu,  hodi halo operasaun ba Grupu Arte Marsiál (GAM) ne’ebé ikus-ikus ne’e halo problema iha Munisípiu Baucau, Liquiça no Díli.

Situasaun ne’e halo komunidade barak  mak senti trauma  no tauk labele halo movimentu iha tempu kalan no viazen ba Munisípiu sira.

“Relasiona  ho akontesimentu   hirak ne’e Komando horiseik hanoin ona haruka karta ba Ministru atu bele halo operasaun  ba  artemarsiais  sira ne’ebé mak  ita haree abuza  demais ona,  halo konflitu akontese iha fatin-fatin,  ita lakohi rai ida ne’e artemarsiais  mak domina fila-fali”,esplika  Komandante Jerál  PNTL Komisariu Julio Hornay, ba jornalista sira Kinta (07/02/19), hafoin enkontru semanal ho Prezidente Repúblika Francisco Guterres Lú-Olo, iha Palasiu Prezidensia Bairo-Pite Díli.

Nia hatutan, forsa,   tantu seguransa  no defeza Estadu Timor-Leste  sei la tolera aktu krimi   husi artemarsiais.

“Tanba ne’e  ita  hein desizaun husi Ministru Defeza no Interior Interino atu ita halo operasaun”,dehan Julio Hornay

Lider Masimu  PNTL ne’e hatutan, artemarsiais hanesan grupu ida pas parte  komunidade Timor.

“Tuir lolos  ita Timor oan senti rai  ne’e  ita nian,   ita hotu kontribui ba estabilidade no pas atu  ita hotu moris  hakmatek, tanba konflitu ne’e  ita liu tiha ona iha tinan 24”,dehan Julio Hornay.avi

Leave a Reply

Your email address will not be published. Required fields are marked *