Futuru veteranu entrega ba jerasaun foun ■Lere husu Governu valoriza nafatin

Xefe Estadu Maior das FALINTIL Forsa Defeza Timor-Leste (TL), Maijor  Jeneral Lere Anan Anan Timur, hateten, veteranu sira prontu atu entrega futuru veteranu sira nian ba jerasaun foun, hodi hatutan mehi veteranu sira nian ba rai doben TL.

Maske nune’e, Lere Anan Timur husu ba  Governu atu valoriza nafatin veteranu sira nia luta.

“Ha’u hanoin Estadu sei tau matan ba veteranu sira nia oan iha tempu tuir mai, ne’eduni ita hotu entrega ba nai ulun sira para bele tau kestaun hodi fó honra ba heroi sira ne’ebé fakar sira-nia ran hodi hetan ukun aan, no parabens ba veteranus  no  sobrevinte sira ho nia komando luta ne’ebé uluk hamutuk hodi luta ba independensia, hodi Timor ba ukun rasik aan. Ne’eduni loron ida 3 Marsu  ne’e, sai loron nasional veteranus nian, no foin mak selebra ba dala 2, nune’e presiza tempu atu hadia veteranu sira-nia moris. Nu’udar komandante senti triste wanhira veteranu sira hato’o sira-nia lamentasoens, maibé Timor nia realidade mak ida ne’e. ne’eduni sei iha tempu atu rezolve problema sira ne’e hateten”,  hateten Lere Anan Timur ba Jornalista sira, hafoin seremonia iha Palásiu Governu, Domingu (03/03).

Lere mós husu  ba veteranu sira atu hakmatek hodi  garante estabilidade nasionál, hodi fó tempu ba nai ulun sira   atu rezolve problema veteranus nian, tanba ohin loron veteranu sira mak  mak sei kaer hela ukun.

“Hanesan Prezidente Repúblika,  Fancisco Guteres Lu-Olo, Primeiru Ministru,  Taur Matan Ruak,  ho Xanana Gusmão no sira seluk tan”, dehan tan.

Tanba ne’e, Tuir Lere Anan Timur, afirma, veteranu sira tenki  laran metin nafatin ba ukun na’in sira  atu  rezolve problema veteranu nian. aba