Faustino da Costa:Lá tolera membru Migrasaun kobransa ilegál

Komandante Jerál Polísia Nasionál Timor-Leste (PNTL) Komisáriu  Faustino da Costa hateten, sei la tolera membru Migrasaun ne’ebé mak deskonfia involve kobransa ilegal osan  ba ema estranzeiru U$ 200.

Komisáriu  Faustino da Costa hatoo lia hirak ne’e ba jornalista sira Sesta (12/04/19), relasiona ho deklarasaun Ministru Defeza Interior Interino Filomeno Paixão,  ne’ebé mak hato’o lamentasaun ba membru Polísia Servisu Migrasaun balun servisu  iha Aeroportu Internasionál Nicolau Lobato Comoro Díli fronteira no Batugade, deskonfia halo kobransa ilegal ba ema estranzeiru sira ne’ebé mak tama sai nasaun RDTL.

“Ha’u mai enkontru ha’u mós koalia mós ho sira, aktu hahalok ida ne’ebé la merese, sé iha karik evita, tanba  ha’u sei la tolera ida ne’e. Ha’u mós hatene Inspesaun Jerál Estadu halo ona audit ba Migrasaun, ne’ebé  ita hein kuandu rezultadu ikus  ha’u detekta failansu balun  iha infrasaun balun ne’ebé mak komete, klaru que ida-idak presiza responsabiliza ida ne’e. Tanba  komando nunka orientan nia membru kontra lei”,dehan  Faustino da Costa.

Wainhira rona tiha informasaun ne’e husi Ministru Defeza Interior Interino, kona-ba kazu refere, Diretór Jerál Servisu Migrasaun Superintendente Assistente Boavida Ribeiro, kontaktu kedas ba Komandante Postu Migrasaun  iha Aeroportu Internasionál Nicolau Lobato Comoro Díli no fronteira Batugade, hodi buka identifika membru ne’ebé mak komete iha iha kobransa ilegal hodi bele submete ba prosesu investigasaun.avi