Filomeno Paixão: Polísia Migrasaun balun prátika kobransa ilegal

Ministru Defeza no Interior  Interinu, Filomeno Paixão, lamenta  ajenti Polísia balun servisu iha Migrasaun halo kobransa ilegal ba ema estranjeiru sira ne’ebé mak tama iha Timor-Leste.

“n Ministru Interior  tanba ikus-ikus  ne’e keisa demais ona  mai  husi sidadaun estranjeiru, ne’ebé tama iha Timor sira fó hatene ba ha’u surat, balun verbalmente katak, sira selu osan  ne’ebé  ita-nia ajenti Migrasaun balun halo kobransa ilegal, liu-liu iha  Aeroportu  no  fronteira iha Batugade. Tanba  ne’e mak ha’u hakarak fó hatene ba populasaun, ba sidadaun estranjeiru sira tama mai Timor-Leste, karik ema Migrasaun husu osan de forma ilegal, la tuir lei, la tuir regulamentu ne’ebé mak estabelese ona iha RDTL atu avontade kontaktu ha’u diretamente liu husi telefone 78326687, ida fali mak 77172992,  iha ne’e  funsionáriu  ne’ebé mak servisu  besik ha’u nia gabinete para sira bele kontaktu imediatamente mai ha’u atu hola asaun”,esplika Ministru Defeza no Interior  Interinu, Filomeno Paixão,  ba jornalista sira Kinta (11/04/19) iha Ministériu Defeza Fatuhada Díli.

Tuir  Filomeno Paixão, osan ne’ebé mak deskonfia ajenti Polísia balun kobra husi ema estranjeiru  ida hakarak servisu  ho montante USD 200.

Alende keisa oral no eskrita, Filomeno Paixão, dehan,  iha mós gravasaun video, fó hatene katak, liu-liu ajenti sira Aeroportu iha Díli no iha Batugade, demais ona, ida ne’e ténki remata.

“Ha’u bolu ona Diretór Jerál Migrasaun Boavida Ribeiro dala rua ka dala tolu ona ténki akaba ona buat ne’e iha Timor, lakohi haree tan buat hanesan ne’e. Ema mai husi liur ilegal ne’e, iha problema iha Migrasaun, ida ne’e ténki  akaba ne’ebé ha’u sei la halimar sei aplika  medida  ne’ebé mak tuir lei”,dehan Filomeno Paixão.

Kona-ba kuantidade  ajenti ne’ebé mak deskonfia involve iha kazu ne’e, Filomeno Paixão, lakohi esplika sai.

Relasiona ho lamentasaun  Ministru Interior Interinu, Filomeno Paixão,  kona-ba membru  Migrasaun balun halo kobransa ilegal  ba ema estranjeiru sira ne’e, Diretór Jerál  Servisu Migrasaun Superintendente Assistente  Boavida Ribeiro, kontaktu kedas ba komandante Postu iha Aeroportu hodi informa  buka identifika membru ne’ebé mak komete iha kazu refere.

“Ohin (Horiseik) ha´u  telefoni kedas Komandante Postu, tanba iha Aeroportu Internasionàl mak kazu ne´e akontese,  ha´u orienta Komandante Postu hotu-hotu atu identifika  karik deskonfia  involve para halo relatoriu hodi loke prosesu investigasaun”,dehan nia.avi