Manifestasaun mosu anarkizmu iha PN ilegál ■PNTL detein suspeitu na’in rua

Komandante Operasional Nasional (KON) PNTL Superintendente Xefe  Pedro Belo, konsidera manifestasaun husi negosiante ambulansia iha resintu Parlmentu Nasional ilegal. Tanba ne’e, Polísia Nasional Timor-Leste (PNTL) Munisípiu Díli  detein ona suspeitu nain rua iha sela.

 “Ha’u hakarak hateten, demonstasaun sira hala’o horseik  ne’e  la tuir rekejitus  ne’ebé mak  iha  tanba saida  ha’u  koalia hanesan ne’e,  tanba  iha lei demonstrasaun iha lei númeru 1/ 2006, iha artigu 10  hateten  katak, sé de’it mak   halo manifestasaun iha fatin públiku  antes   loron   haat  atu hahú manifestasaun  I nia  ténki hatoo karta antes ba autoridade sivil no Polísia, depois ida ne’e mak sira foin halo sira ninia aktividade manifestasaun. Maibe kuandu  loron ida ita foin hatama karta ida depois  tuir mai  ita halo kedas demonstrasaun  ha’u hanoin katak la tuir ona rekejitus  ne’ebé mak  lei hakerek. Nune’e mós karta  ne’ebé   mak sira fó iha dia 1 Abril 2019 katak, sira ninia aktividade ne’e atu hala’o iha Largo Licidere  la’os  iha Parlamentu Nasional oin”,esplika KON Superintendente Xefe  Pedro Belo, ba jornalista Kuarta (03/04/19) iha Kuartel Jerál PNTL Díli.

Pedro Belo akresenta,  iha artigu 5 lei demonstrasaun  fatin ne’ebé mak atu halo demonstrasaun proibidu atu halo  manifestasaun hanesan fatin orgaun soberanu, hanesan Parlmentu Nasional, Palasiou Governu, Palasiu Prezidensia  nune’e mós Portu no Aeroportu  ne’e,   lei demonstrasaun la fó fatin, wainhira hala’o manifestasaun  ténki  ho  distansia  100.

“Kuandu  ita kontra ona artigu 5 lei demonstrasaun  mak  iha  artigu 7 Polísia ténki halo intervensaun para  hapara ema labele halo manifestasaun iha fatin sira bandu. Bainhira Polísia la halo nia funsaun tuir  artigu 7 mak orgaun soberanu  bele halo keisa  hasoru Polia tanba  la halao nia dever  ho diak. Tanba  ne’e mak  Polisia a nia atuasaun  horseik ne’e bazeia ba lei demonstrasaun númeru  1/2006 artigu 7, tanba manifestante sira kontra artigu 5, tanba ne’e mak Polísia hala’o nia servisu tuir lei, tanba  ne’e mak kaer suspeitu nain rua   ne’ebé mak oras  ne’e detein ona iha sela Polísia  hodi kontinua halo primeiru interogatoriu ba Tribunal”,dehan Pedro Belo.avi