Pedro Belo husu ema hotu apoiu Euclides Belo

Komandante PNTL Munisípiu Díli sesante  Superintendente Xefe  Pedro Belo,   wainhira   halo despedida  ho membru PNTL Munisípiu Díli,   Kinta (04/04/19),  iha Kuartel PNTL Munisípiu Caicoli Díli,  Pedro Belo husu   ema hotu atu apoiu nafatin  Komandante PNTL foun Interino Munisípiu Díli Superintendente Assistente Euclides Belo.

“Tanba  Euclides nia  la’os oin foun ida, nia hamutuk ho ha’u kleur  tiha ona, uluk nia mai mós ha’u dehan o avansa ona sé  ha’u mak iha oin nafatin aban bairua,  ha’u sai ema la koñese o,  tanba ne’e mak o ténki avansa ba oin, buat ruma ha’u hamrik iha kotuk, bainhira  iha mudansa ruma o pronto ona  iha ha’u nia fatin,  kuandu o  la prepara a’an didiak buat ne’ebé ha’u koalia  mak loron ida o sei sai penontong, ha’u ba tiha ema seluk mak sei mai o sei laiha fatin ida ne’e. Tanba ne’e mak iha tinan hira nia (Euclides) mai ha’u dehan o besik kedas Media sira, labele trata malu ho media, tanba media mak halo o nia naran bo’ot,  media sira mak sei lori o nia informasaun sai susesu  ba komunidade”, esplika Pedro Belo.

Pedro Belo akresenta,  tinan 12 nia komanda PNTL Munisípiu Díli, la’os buat ida fasil.

“Bainhira   ha’u servisu iha 2007, Díli ne’e ema hotu hatene iha momentu ne’e oinsa  iha grupu armada barak-barak iha Díli laran, ema halo auto stop  iha fatin-fatin, iha  buat barak mak  ita hasoru”,dehan Pedro Belo.

Pedro Belo, konsidera  servisu tinan  Komanda PNTL Díli senti kleur, la’os tanba  nia   maka’as liu, maibe  tanba apoiu husi autoridade lokal no  komunidade iha Díli laran no apoiu mós husi Komandante seksaun  no ajenti tomak Polísia nian  ho Igreja, Veteranus.

“Ha’u la halo hatoo agredese ba imi hotu-hotu, ne’ebé mak durante ne’e fó apoiu mai ha’u, ha’u fiar katak imi nia konfiansa ne’e mak  ohin loron ha’u sai Komandante Operasional  Nasionál PNTL”,dehan Pedro Belo.

Iha fatin hanesan Komadante PNTL Munisípiu Díli Interino  Superintendente Asistente Euclides Belo, agradese Komandante PNTL sesante Munisípiu  Superintendente Xefe pedro Belo, ne’ebé mak durante tinan 12 servisu hamutuk hodi komanda PNTL Munisípiu Díli.

 “Ami laiha  buat murak ida atu fó ba  nia, maibe  hanesan hirakia Komando ami hatudu mak ami nia prontidaun hodi kumpri ordem   nafatin  hato’o mai ami, dadauk ne’e  ba iha Komandante Operasional Nasionál”,dehan Euclides Belo.

Reprezentante Prezidente Autoridade Munisípiu Díli atual Atual Vice Autoridade Munisípiu Díli Jeca Smith hateten, fó parabens  ba Komadante  sesante PNTL   Munisípiu Díli Pedro Belo,  ne’ebé mak asumi kna’ar nudar Komandante Operasional Nasionál PNTL.

“Konfiansa  ne’ebé mak Komandante Operasional Nasionál PNTL  Pedro Belo hetan, ne’e mós  husi konfiansa ita hotu-hotu, ita nia kooperasaun ho Komandante Pedro Belo ho ninia Adjuntu ho ninia ajenti sira hotu mak bele fihir hetan  entre Komandante PNTL Munisípiu sira 12  ne’e, ita nia Komandante mak terbaik liu”,dehan Jeca Smith.

Marka prezensa iha seremonia despedida ne’e  alende Reprezentante Prezidente  Autoridade Munisípiu Díli Jeca Smtih,   marka mós prezensa husi Administrador Postu sira, hanesan Postu Administrativu Metinaro, Cristo-Rey, Nain-Feto, Verra-Cruz, no Dom Alexio,  Xefe Suku sira no Konsellu Polísiamentu Komunitaria, Zenilda Gusmão, Komandante PNTL  Munisípiu Díli sesante Pedro Belo ninia espoza no pareseiru PNTL Australia Timor-Leste Police Development Program (TLPDP).

Entretantu Komandante  PNTL sesante Munisípiu Díli  Pedro Belo, transfere hodi simu kna’ar foun  nudar Komandante Operasional Nasionál PNTL iha semana kotuk.avi