Ajenti PNTL CSP deskonfia baku médiku ida iha SSC

Ajenti Polísia ida ho inisial LG husi Korpu Seguransa Pesoal (CSP-sigla Portugés),  deskonfia baku médiku Constâncio Barreto, iha Sentru Saúde Comoro (SSC), no  membru CSP ne’e mós  ameasa foti pistola  hodi tiru enfermeiru sira.

Insidente ne’e, akontese  Kinta (02/05/19) iha sentru Saúde Comoro, Postu Administrativu Dom Alexio Munisípiu Díli,  mais ou menus tuku 8 dadersan oras  Timor-Leste.

Tuir  kronolojia akontesimentu haktuir  husi  vítima,  mediku  Costncio Barreto  katak,   insidente  ne’e akontese,  wainhira  nia atu fila ba uma, tanba sift  iha Kuarta  (01/05/19)  tuku 8 kalan no iha  Kinta Feira,  tuku 8 dadersan,  mediku  Constâncio Barreto, halo  relatoriu entrega ba dotor seluk hodi  hodi hala’o fali servisu  atu atende  pasiente sira, maibe  ajenti Polísia ho inisial LG lori nia oan  nain rua,  mai iha Sentru saúde Komoro, obriga infermeira sira ténki halo atendementu lalais ba ninia oan nain rua tanba moras.

Membru Polísia ne’e mós ho nervozu hodi  simu malu ho infermeira sira.

Wainhira  rona liafuan hirak ne’e, Constâncio Barreto,  tenta  koalia didiak,  ho membru Polísia ne’e, maibe membru Polísia ne’e lamenta hodi kaer kapaseti baku kedas Constâncio Barreto nia liman, rezulta kanek Kaman.

Alende ne’e,  membru Polísia ne’e mós,  ameasa foti pistola iha uma atu tiru   mediku sira.

Ho akontesimentu ne’e, vítima  Constâncio Barreto, lamentavel  tebes, Constâncio mós husu komando Jerál PNTL loke prosesu investigasaun.

“Ha’u koko hakbesik ba nia atu koalia ho pesoal Polísia LG, hodi hakalma nia, maibe labele nafatin hodi sai ba liur, nia hakilar ema hobur barak situasaun manas tan, ha’u koko nafatin bolu nia atu koalia,  entaun nia lakohi nia ba tuur iha  nia motor leten, ha’u mós fila-fali ba sala emerjensia,  soque ha’u atu fila, pesoal Polísia tama lori kapaseti hodi tuda ha’u nia liman,”esplika vítima,  mediku  Constâncio Barreto, ba GMN, liu husi konfrensia imprensa iha Sentru Saúde Komoro.

Constâncio Barreto akresenta  katak, pesoal Polísia ne’e la uza farda, nia mai ho sivil de’it.

“Depois nia liafuan balun ne’ebé mak sai, iha sasin balun rona dehan,  sé imi mangama ha’u fila ba uma lori pistola tiru imi nia matan fuan  naklosu sai hotu”,dehan Constâncio Barreto.

Alende ne’e, Xefe Sentru Saúde   Comoro Abel Barreto do Santos, husu ba pasiente  ne’ebé mak mai halo tratamentu ténki ho pasensia, la’os obriga de’it mediku sira.

“Ha’u husu bas é de’it kuandu mai halo tratamentu ténki pasensia, labele hatudu fali atetudu bandalismu iha fasilidade saúde”, Abel Barreto do Santos.

Relasiona ho akontesimentu ne’e Diretóra Servisu Saúde Munisípiu Díli Agostinha  da Costa Saldanha  Segurado, tun ba observa kedas  problema   ne’e iha Sentru Saúde Komoro. Hafoin observa tiha, Agostinha  da Costa Saldanha  Segurado,  konsidera insidente ne’e hanesan ameasa boot ba  profesionais saúde sira hotu.

“Ha’u nia observasaun  jerál ba akontesimentu ida ne’e  katak,  ida  ne’e sai hanesan ameasa boot ida ba iha  ita nia fasidade saúde, liu-liu ba  ita nia profisional saúde sira hotu ne’ebé mak hamahon a’an hodi oferese servisu  ne’ebé ba komunidade iha  área Dom Alexio nian”,dehan Agostinha  da Costa Saldanha  Segurado.

Tuir planu,   vítima Constâncio Barreto,  ho nia  kolega funsionariu  funsionariu nudar sasin,  sei hato’o keisa ba PNTL, Eskuadra Dom Alexio Munisípiu Díli hodi loke prosesu investigasaun.

To’o notísia ne’e hatún, GMN seidauk hetan konfirmasaun husi líder máximu husi instituisaun PNTL.avi