FRETILIN husu meja PN halo leitura karta lamentasaun husi PR ba deputadu Guntur

Bankada Fretilin husu ba meja Parlamentu Nasionál (PN) atu ajenda no halo leitura karta lamentasaun husi Prezidente Repúblika (PR), Francisco Guterres Lú Olo, ba publikasaun deputadu bankada PLP, Sabino Guntur iha media sosial facebook (fb).

Deputadu Sabino Guntur defama Xefe Estadu liu husi rede media social ne’ebé hakarek iha nia pájina Facebook (FB) ho liafuan “Goblok” hasoru Xefe Estadu foin lalais ne’e.

Relasiona ho liafuan ne’e, Xefi Estadu, Francisco Guterres Lú Olo, haruka ona karta lamentasoens ba Parlamentu Nasional iha loron 14 fulan Maiu foin lalais, nune’e mós lidere bankada parlamentares fó ona apresiasaun no sei diskute asuntu refere iha semana oin.

“Mensajen Prezidente karik lé iha plenaria, e ne’e sujestaun para povu bele akompanña mensajen prezidente ne’e hanesan ne’ebé ?; E ne’e para povu hatene Xefe Estadu nia mensajen ba orgaun parlamentu ne’e hanusa ?; Ne’e bele fanu deputadu, reprezentante povu ne’e koalia karik oinsa, liga mensajen Xefe Estadu. Ha’u rona katak prezidente lakohi halo leitura iha plenariu e depois distribui deit ninia kopia ba deputadu sira, maibe normalmente prezidente nia karta mensajen sempre halo leitura, e agora se lae ne’e, tenke subar fali saida, ne’e mak ha’u la hatene,” afirma deputadu bankada FRETILIN, Antonino Bianco, iha PN, Kinta (16/05/2019).

Tenke respeita líderansa sira

Iha parte seluk deputadu bankada PLP, Cornelio da Conceição ‘L-7’, lamenta ho liafuan goblok husi deputadu Guntur hasoru PR Lú Olo, L-7 konsidera la respeita líder rezistensia.

“Ha’u nia posizaun mak ne’e, ida kuandu sala ona tenke kaptura, tanba estraga nasaun, e  ita haree durante tinan 24. Xanana, Taur, Lere, Lú Olo, Mario, sira nain hira ne’e ami respeitu hanesan maromak, maibe foinsa’e agora ne’e mak tolok no koalia at tuir nia hakarak, e ne’e ha’u lakonkorda, e ha’u nia prinsipiu mak ne’e kapturadu,” afirma eis gerilheiro, L-7. Ito