JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

KSTL keixa aktu membru PNTL ba PN

KSTL keixa aktu membru PNTL ba PN

Konfederasaun Sindikatu Timor-Leste (KSTL), keixa aktu membru Polísia Nasionál Timor-Leste (PNTL), Batallaun Ordem Públiku (BOP) ba Komisaun B, ne’ebé trata asuntu defeza no seguransa iha Parlamentu Nasionál (PN), tanba halo atuasaun direita iha asaun pasífika ne’ebé halo husi ajente ministériu edukasaun, hodi kontra desizaun ministra edukasaun ne’ebé loke rekrutamentu foun, hafoin deside la re-ativa kontratu ba ajente 273, ne’ebé sira-nia kontratu remata iha fulan Dezembru tinan 2018 liuba.

Sekretáriu  Jerál KSTL, José da Conçeição konsidera, aktu BOP nian ne’ebé dudu no duni sai ajente sira iha salaun infordepe ne’e, nu’udar aktu ida atu hamate direitu atuasaun la bazeia ba nessesidade, maibé bazeia ba desizaun polítika.

“Ami mai hato’o lamentasaun no keixa kona-ba atuasaun PNTL BOP nian iha asaun pasífiku ne’ebé mak ami halo, iha salaun infordepe ministériu edukasaun nian, ne’ebé akontese iha Kinta-feira semana kotuk. Polísia nia atuasaun ne’e halakon fali ami-nia direitu, no justisa ne’ebé mak ajente edukasaun 273 ne’e hasoru. Polísia nia intervensau ne’e lolos bazeia ba nessesidade iha terrenu, ezemplu husi OPS depois Taskforce, maibé iha ne’eba buat ida la akontese, derepente de’it sira tu’un, la’os bazeia ba nessesidade iha terrenu, maibé ami haree hanesan bazeia fali ba desizaun polítika, ida ne’e hamate povu nia movimentu, liu-liu sira nia hanoin no ejizensia kona-ba sira-nia direitu ne’ebé mak lakon,

sei polísia halo atuasaun ho arma kompletu hanesan ne’e, halakon ita-nia povu nia hanoin, liu-liu ba ejizensia povu nia ba polítiku sira, tanba ne’e ami haree ida ne’e la kontente, ne’e mak ohin ami mai hato’o lamentsaun ba komisaun B, depois ami sei hatama tan lamentasoens por eskritu, hodi nune’e buat karik nesesita, ministériu relevante ho komisaun B bele diskute,” hateten José da Conçeição, ba jornalista sira hafoin hasoru malu ho komisaun B, iha PN, Kuarta(29/05/2019).

Lee hotu :   Lere: F-FDTL presiza Ró kontrola tasi Timor

José da Conçeição haktuir, lamentasaun ne’ebé to’o hamosu asaun, tanba Ministériu edukasaun la kumpri konkordansia ne’ebé iha entre ME ho ajente sira kona-ba rezultadu diagnóstika.

“Konteudu lolos mak ne’e, tanba prosesu diagóstika ne’e seidauk remata, depois problema ne’e mós seidauk iha dalan ruma atu solusiona, di’ak liu ida ne’e para lai, rezolve lai, problema 273 nian ne’e tenki rezolve lai, buat hotu tenki klaru, kona-ba prosesu diagnóstika ne’e seidauk fó sai kompletu dei’t, derepenti loke vaga ne’e mak kestiona. Depois loke vaga ne’e mós, sira ajente sira ne’e tuir para muda sira-nia estatutu la’e, sira kuandu ba tuir tes, sira nafatin hanesan  ajentes administrasaun publik, ida ne’e labele, sei ita hanesan eskola karik, SMA klas 1, tuir ezame para atu passa ba klase 2,  la’os atu nafatin klas ne’e de’it la’e”, esklarese Sekretáriu Jerál KSTL ne’e.

Kona-ba asaun ne’ebé hala’o husi ajente ME nian ne’e, Sekretáriu Jerál KSTL konsidera, la presiza hato’o ba polísia, tanba la’os ema husi liur mak halo asaun, maibé ajente ME rasik halo asaun, no iha asaun refere la uza buat kroat no lahamosu krime ruma.

“Tanba sira haree katak, ida ne’e la justu ba sira, liu-liu kona-ba prosesu diagnóstiku mapa de vagas no mapa pessoal ne’ebé rezultadu to’o agora kuaze fulan 6 ona rezultadu seidauk iha, depois hamosu ka loke tan fali konkursu públiku foun ne’e mak ami la simu, maluk sira ne’e lamenta no la simu, tanba sei ida ne’e direitu ajente sira-nia ema haluha no lakon ona, injustisa ne’ebé mosu ne’e lakon ona, rejistrasaun ba konkursu foun ne’e loke iha dia 20, maibé tanba problema ne’e seidauk iha klareza, laiha dalan no opsaun ruma atu rezolve, tanba ne’e mak ajente sira ne’e ba iha ne’eba, hateten dehan, para lai ba loke konkursu foun ne’e, iha momentu ne’eba para tiha ona, tanba iha konkordansia ho Diretur jerál ME nian, atu nune’e bele iha konfirmasaun ba ministra oinsa buka solusaun, hafoin bele loke hikas, maibé iha Kinta ami BOP iha tiha ona, seidauk iha asaun ruma, ami la lori ai-sanak ida, surat tahan ida mós lamonu durante loron Tersa no Kuarta nian ne’e, depois Kinta ami cek fali konkordansia ne’ebé ami halo ho DJ katak, atu pending lai, maibé sira obriga atu halo, entaun mosu diskute malu oituan, sira (BOP) rasta ami no dudu ami sai, maibé objetivu ami nia tama ba salaun laran ne’e mak, atu konfirma de’it oinsa ho konkordansia ne’e, maibé BOP sira tama ba atu forma ema, balun simu dokumentus, ami haree katak buat ne’e ladun di’ak, ladun loos no ladun professional”, tenik José.

Lee hotu :   PM Alkatiri apela ba PNTL labele ameasa povu

Hatan ba lamentasaun hirak ne’e, deputadu komisaun B Parlamentu Nasionál, Luis Roberto, relata, ajentes no KSTL hasoru komisaun B ne’e hanesan verbal de’it, tanba ne’e kommisaun B sujere atu halo kompleta dokumentus balun kona-ba problema refere, nune’e komisaun B bele bolu ministériu defeza no seguransa hodi husi klarifikasaun.

“Sira lamenta tebes ho intervensaun BOP nian, ne’ebé lamerese para sira atu tu’un, tanba asaun ne’e asaun pasífiku tebes, sira la halo violénsia ruma iha ne’eba, maibé tanba ordem ne’e mai husi ema polítiku sira, entaun ita-nia maluk seguransa sira implementa ordem de’it, maibé tuir lolos asaun ida hanesan ne’e la presiza BOP tu’un para halo atuasaun.  Ami mós sei prepara ajenda ruma para bolu ministru defeza no seguransia nian para bele ko’alia kona-ba asuntu ne’e”, informa Luis Roberto.

Entretantu, kontratu ba ajente administrasaun públika ministériu edukasaun nian 273 ne’e, remata iha fulan Dezembru tinan 2018 liu ba, no ministra edukasaun deside la re-ativa hodi loke hika’as rekrutamentu foun ho razaun atu buka ajente ne’ebé kualidade, tanba ne’e, iha Kinta semana kotuk, ajente hirak ne’e lamenta, no halo asaun pasífika hodi hamosu dezentendimentu entre membru PNTL BOP ho ajente hirak ne’e, bainhira ajente sira ne’e tama ba salaun infordepe ministériu edukasaun atu konfirma konkordansia entre ME ho ajente sira ne’e nian, tanba ajente hirak ne’e ezije ministra edukasaun atu fó sai uluk rezultadu diagnóstika, hafoin bele halo rekrutamentu foun, maibé ME la halo tuir konkordansia refere, Ikus mai mosu dezentendimentu ne’e.say

Add to Comments Here!!!!

error: Content is protected.
Secured By miniOrange
You might also like:
DIA 29/05/19 || GMNTV LIVE STREAM || JORNAL NASIONAL KALAN

DIA 29/05/19 || GMNTV LIVE STREAM || JORNAL AS 12

UE hakarak halais akordu deskonsentrasaun no desentralizasaun administrativa

Embaixador Uniaun Europia (UE) Alexandre Leitão...

Close