Polísia SAT detein joven na’in rua lori kro´at iha kalan

Unidade Espesial Polísia (UEP)  husi Seksaun Anti Terrorizmu (SAT)   detein  joven  na’in rua  ho inisial AS no AD iha Rotunda Comoro tanba lori  tudik.

Suspeitu  na’in rua ne’e detein Kinta (13/06/19), mais ou menus tuku tuku 8  kalan,   oras  Timor-Leste, iha Rotunda Comoro, Postu Administrativu Dom Alexio, Munisípiu Díli.

Tuir informasaun, husi suspeitu nain  rua ne’e  katak, sira nain rua hemu  tua,  iha Tasitolu Díli, wainhira  fila   husi  Tasitolu, Polísia SAT  hala’o operasaun,la´o ain husi Kuartel Unidade Espesial Polísia, Bairu-Pite, liu husi Ponte Komoro 3, hafoin liu husi Kampung Baru, wainhira to´o Rotunda  Komoro,  membru SAT sira atu atravesa ba iha Postu Batalian Ordem Públika,  iha área refere, maibe joven  nain rua kondus  motor Mio J ho sapa matrikula E. 9399 TL,  ba soke kedas membru Seksaun Anti Terrorismu sira.  Tanba  ne’e  Polísia halo kedas atuasaun hodi detein  joven  nain rua ne’e. Hodi husu sidadaun nain rua ne´e, orijin husi Munisípiu Ermera.

Hafoin  ne’e, Polísia lori kedas suspeitu nain rua ba intrega ba iha Eskuadra Dom Alexio, hodi submete ba prosesu  investigasaun, hafoin lori ba detein iha sela detensaun PNTL Munisípiu Díli.

Komandante Unidade Espesial Polísia,  Superintendente Xefe Afonso do Santus, tun dereitamente  iha terenu hodi observa  membru sira ninia operasaun.

 Afonso do Santus hateten, operasaun ne’e hala’o tanba orientasaun eskrita  husi Komando jerál PNTL hodi  buka tuir suspeitu sira kaer sasan kro’at hodi hakanek komunidade sira iha tempu kalan. Durante  operasaun  Unidade Espesial Polísia sei la tolera krimi husi suspeitu sira.

Alende ne´e, operasaun ne´e la´os hala´o de´it  iha Díli, maibe hala´o mós iha Baucau  no  iha Munisipiu Bobonaro.

“Operasaun ne´e nia durasaun Komandante Jerál la esplika  iha ne´ebá, ha´u hanoin operasaun ida ne´e kalan-kalan“,dehan Afonso do Santus

Entretantu tuir lei númeru 5/2017/ bandu  ema kaer sasan  kro’at hodi haakenek no habadak ema ninia vida.

Antes ne´e,  membru ajenti, Polísia ho naran  kompletu  Inacio  De Carvalho, idade 26/  hetan ta’a  husi ema deskoñesidu  nain   rua iha  área eskola 30 Agostu Komoro, Postu Administrativu Dom Alexio Munisípiu Díli.avi