Tribunal deside entrega bebé ba nia inan-rasik ■ Komunidade Lahane konsidera injustisa

Polísia Nasionál Timor-Leste (PNTL ), kumpri desizaun Tribunal Distrital Díli hodi obriga  komunidade Mario Nunes  Sarmento, ne’ebé hili bebé  Cristovão Coração Soares Fereira, ba nia inan rasik ne’ebé partu no soe hela iha uma mamuk ida atu bele fo susu.

Enkuantu desizaun TDD,   iha Kinta (06/06/19), aplika aprezentasaun periódika semana ida dala ida ba arguida  IRP (arguida soe bebé) no kona-ba bebé ne’e ténki entrega ba família no nia inan atu nune’e bele fó susu.

Tanba  ne’e, iha Sesta (07/06/19), mais ou menus tuku  5 lorokraik oras Timor-Leste,  Polísia  husi Eskuadra Verra-Cruz,  ba Sentru Saúde Verra Cruz hodi obriga Mario Nunes  Sarmento, ténki entrega bebé ne’e ba arguida ninia família. Maibe  komunidade barak husi Aldeia Teca-Hudi Laran mós, barak tebes  iha sentru saúde Verra-Cruz, fó apoiu ba  Mario Nunes  Sarmento, atu labele entrega bebé ne’e.

Maske nune’e, parte Polísia nafatin obriga Mario Nunes  Sarmento, ténki ba sa’e kareta Polísia, maibe hetan impedimentu husi komonidade Teca-Hudi Laran, atu bebé  ne’e la presiza lori ona ba eskuadra Polísia Verra-Cruz.

Nune’e Polísia Batallaun Orden Públika, ho kareta kamioneta metan ida to’o,  iha Sentru Saúde Verra-Cruz,  asegura kedas bebé ne’e hodi lori ba iha Eskuadra Polísia Verra-Cruz, ne’ebé mak lokalizadu iha Caicoli  Komando PNTL Díli.

“Polísia hadau bele hadau, maibe ami presiza akordu ruma mak  bele foti bebé ne’e, agora karta ruma laiha, ami bele fó de’it, ami la’os suspeitu, prosesu bele la’o nafatin”,esplika  Lorença Soares Ferreira, ba jornalista sira iha Sentru Saúde Verra-Cruz Caicoli Díli.

Alende ne’e,  dotor no dotora sira Sentru Saúde, Verra-Cruz,  iha Sesta (07/06/19),  informa komunidade Mario Nunes  Sarmento hodi  fó alta  ba bebé Cristovão Coracão Soares Fereira,fila-fali ba uma.

“Kona-ba  situasaun ne’e,  ami hanesan mediku, ami la hatene, halo komentariu. Ne’e Polísia nia servisu, ami hanesan dotora haree de’it labarik ninia kondisaun, nia diak ona, nia laiha isin manas, entaun ami haruka alta ona”,dehan dotora Dilaila Florival.

Enkuantu bebé ne’e hetan husi Mario Nunes  Sarmento, iha  uma mutin mamuk ida iha Aldeia Teca-Hudi Laran  Tersa (04/06/19) no nia inan husik hela, nune’e komunidade sira hetan no kesar kedas ba PNTL no PNTL detéin kedas arguida IRP soe bebé ne’e iha sela detensaun PNTL Díli.

Relasona ho kazu refere, GMN,   ba kedas iha Kuartel PNTL Díli, atu halo konfirmasaun, ho Komandante PNTL Munisípiu Díli Interino Superintendente Assistente Eclides Belo, maibe Komandante ne’e laiha fatin.

Inan-feton sira labele soe bebé hanesan lixu

Eis Prezidente Repúblika Timor Leste, José Ramos Horta, husu ba inan-feton sira atu labele soe bebé hanesan soe lixu, maibe lori ba fó madre sira ou  ONG sira para bele tau-matan, enkuantu inan husi bebé sente laiha kapasiadade atu tau matan.

Premiadu Nobel da Paz, José Ramos Horta, hato’o asuntu ne’e hafoin hala’o lansamentu ba programa angariasaun fundu ONG FOKUPERS, iha Balapasu Díli, semana kotuk foin lalais ne’e.

“Ha’u lakohi kondena ba inan feton-sira, feto mak halo ida ne’e tanba dezesperu los, sé lakohi haree labarik ne’e favor lori labarik ne’e ba madre sira, lori mai FOKUPERS, e lori mai ha’u nia uma, e depois ha’u haree no lori labarik ne’e ba ne’ebé, la’os soe fali iha lurón hanesan lixu fali”, afirma José Ramos Horta, relasiona ho kazu ema soe bebé ne’eb’e kontinua aumenta iha rai laran liu-liu iha kapital Dili.

Durante ne’e kazu soe bebé akontese ona iha kapital Díli mak hanesan, iha suku Hera, Bairo Marconi, suku Becora no mós iha munisípiu Viqueque.

No iha iha kuarta loron 4 fulan Juñu tinan ne’e akontese ema soe bebé iha Aldeia Teca Hudi-Laran, Suku Lahane Osidental, Postu Administrativu  Verra-Cruz, Munusípiu Díli.

Komunidade  Lahane konsidera injustisa

Kazu soe bebé ne´ebé akontese foin lalais ne´e iha Aldeia Teka Hudi-Laran,  Suku  Lahane Osidental,  Postu Administrativu Vera Cruz, Munisípiu Díli  ne´e Tribunal Distrital Díli (TDD) deside komunidade ne’ebé hetan bebé ne’e entrega hikas ba nia inan, tamba ne’e komunidade sira konsidera justisa iha Timor-Leste lao la loos. iha Timor Leste (TL) lalos.

“Ami komunidade Suku Lahane ezije ba Ministériu Públiku prosesa kazu ne´e ba oin, tamba sa mak ema koko atu estraga bebé sei hetan nafatin proteje husi parte polisia. Tanba sa polisia defende ema kriminozu ne´ebé atu oho bebé, maibé kondena fali Sr. Mario ne´ebé salva bebé nia vida?”, argumenta porta voz Komunidade, Mateus Barreto, liu husi konferensia imprensa Sábadu (08/06/2019) iha Aldeia Teka Hudi-Laran.

Tanba ne´e sira ejije família bebé atu fó fila fali bebé ne´e ba parte estadu hodi halo prosesu tuir mai, bainhira la fó fila bebé refere komunidade sira sei halo asaun pasífika ida tribunal atu hatur lolos justisa ne´ebé mak los ba ema hotu.

“Ami hakarak deklara ba públiku katak, komunidade Lahane Osidental lamenta tebes atuasaun husi parte família ne´ebé so´e bebé ho nia advogadu no akompanha mós husi Polisia Nasionál Timor Leste (PNTL) ne´ebé mai hadau foti bebé husi Sr. Mario ne´ebé salva bebé nia vida. Tamba iha momentu ne´eba bebé ne´e so´e hela rai ho kondisaun falun ho ran, Sr. Mario hetan bebé ne´e direitamentu bebé ne´e ba klinika Vera Cruz hodi halo tratamentu iha momentu ne´eba. No iha loron tuir mai parte ne´ebé soe mai ho nia advogadu iha klinika Vera Cruz, hodi haksesuk malu ho Sr. Mario ne´ebé salva bebé ne´e no nia tenke fó bebé ne´e ba nia família no oknum polisia balun tenke asina karta ne´ebé mai husi tribunal, nune´e bele entraga fila fali bebé ba parte família ne´ebé so´e bebé”,lamenta Mateus Barreto.

Nia dehan, sira  hakarak hetan justisa ne´ebé mak los no justu, no sira lakohi ho justisa ne´ebé nakonu kapitalista no famíliarista, katak justisa ne´ebé sosa ho osan, justisa ne´ebé defende nia família, tamba ne´e sira ezije labarik ne´ebé sira hetan ne´e entrega ba Estadu prosesa tuir lei ne´ebé los no justu.

Nune´e mós sira ezije ba família bebé atu lori fila fali naran ba Suku Lahane liu-liu Aldeia Teka Hudi-Laran, tanba hahalok ne´ebé inan moral ne´e estraga komunidade iha Suku refere.Avi/Ito/Aes