ADN lamenta CAC detein ninia funsionáriu

Ajensia Dezenvolvimentu Nasional (ADN) senti lamentavel teb-tebes ho atuasaun ekipa Comissão Anti Corrupção (CAC) ninia’n ne’ebe detein ona funsionariu tékniku ADN husi Indonezia, ho naran Harunu Padmo Wipoyo, tanba deskonfia utiliza kareta Estadu iha loron Domingu.

Ho atuasaun ADN nini’an ne’e ADN konsidera CAC haksoit liu ona responsabilidade governu, tanba bazeia ba kontratu, Harunu hetan previlejiu husi governu ba utilizasaun kareta iha loron Sábadu no Domingu.

“Iha buat rua ne’ebé presiza CAC hatene, primeiru Harunu Padmo Wipoyo hanesan funsionáriu tékniku internasional advisor (Konselleiru internasional) ne’ebé fó apoiu servisu ba governu bazeia ba pedidu governu Timor-Leste iha kontextu kooperasaun bilateral entre nasaun Indonesia no Timor-Leste ne’ebé bazeia mós ba akordu Memorandum of Understanding (MoU) ida entre Ministériu Obras Publika (MOP) Timor-Leste no Ministériu Obras Publika Indonezia, hodi oferese salariu ne’ebé la’os ho nivel asesor internasional, maibé hanesan asesor nasional, tanba ne’e governu fo mos previlejiu seluk ba nia hanesan fo kareta hodi utiliza ba kompras iha Dili laran iha loron Sabdu no Domingu, hala’o servisu inklui selu nia uma kada fulan ne’ebe sita mos iha nia kontratu, maibé tanba saída mak CAC halo fali atuasaun ne’ebé haksoit liu fali governu nia responsabildade, tanba nia mai iha ne’e bazeia ba pedidu governu Timor-Leste nini’an, hodi fó apoiu servisu ba ADN”, Adjuntu Diretór Jeral ADN, Rui Lourenço da Costa ba GMN iha ninia kna’ar fatin, Fatuhada-Díli, Segunda (01-07-2019).

Nia informa, relasiona  ho kazu refere ADN tenta halo konfirmasaun ho parte CAC, hodi aprezenta Harunu nia kontratu, inklui despaixu husi Komandante Polísia katak, kareta ne’e bele halo sirkulasaun iha loron Sábadu no Domingu, atu nune’e bele husik Harunu, maibé parte CAC lakohi rona.

“Obrigatoriumente horiseik (30/6) ha’u fó hatene ona ha’u nia xefi, tanba situasuan ne’e la’os iha kontextu simples, maibé iha kooperasaun bilateral entre nasaun rua ne’e no ohin (1/7) ha’u sei lori dokumentu sira ne’e ba MNEK para sira mós bele hapar ho situasaun  ne’e, karik iha kestaun balun ne’ebé governu Indonezia levanta, tanba ita la asumi responsabilidade hodi proteje saída mak tau ona iha MOU ne’e, tanba horiseik ami tenta esplika ba CAC, maibé lakohi rona no trata ami hanesan na’ok-teen no ami senti ofendidu ho situasaun ne’e, maibé ami kontinua respeitu no parseria servisu CAC, maibé iha kontextu ne’e tenki rona malu, trata malu ho di’ak tanba ami mós liman ain Estadu no ami ba husu atu klarifika de’it, tanba ho hahalok CAC ni’an ne’e bele afeta mos ba servisu ADN, inklui akordu bilateral ne’ebé halo ona”, esplika Rui.

Entretantu funsionariu tékniku ADN ne’e, hetan detensaun hafoin uza kareta Estadu hodi ba kompras no lori ba nia uma, iha Domingu foin la-lais ne’e.

Relasiona ho informasaun ne’e jornalista tenta konfirma ho parte CAC, maibé laiha fatin. ita