Defende kazál Timor-oan, PJR koalia ona KAPOLRI no MJ Indonézia

Governu Timor Leste liu husi Prokurador  Jeral  Repúblika (PJR), koalia ona ho Kepala Kepolisian Negara Republik Indonesia (KAPOLRI) no mos Ministru Justisa (MJ) Indonézia nian atu defende kazál Timor -oan ne’ebé detein hela iha Atambua, Indonézia.

Ministru Justisa Manuel Cárceres hato’o lia hirak nee ba jornalista sira hafoin hasoru malu ho Primeiru Ministru, Taur Matan Ruak, Kuarta (17/07) iha Palásiu Governu.

Governante ne’e dehan tan, Prokurador  Jeral  Repúblika, José da Costa Ximenes, ba to’o ona Indonézia hodi koalia atu defende  dignidade no direitu fundamental sidadaun kazál Timor oan ne’e tuir lei Indonézia nian, tamba Governu Timor-Leste labele hakat liu saida mak sai hanesan soberania Indonézia nian.

“Hau hatene ita nia prokuradoria Jeral da Repúblika ba to’o iha Jakarta ba koalia ho kapolri no ministru justisa Indonézia nian ne’e Estadu Timor-Leste halo atu defende dignidade ho direitu fundamental ita nia sidadaun nian aplikasaun lei buat diferente,hau fiar katak, sira nain 2 mos la sala no hau mos fiar katak, sira nain 2 sala,tamba sira nain 2 lori sasan  tama iha Indonézia nia rai ne’eb’e justisa ne’e ita tetu halo didiak”, dehan Ministru.

Manuel Cárceres esplika  governu sempre apoiu nia sidadaun, apoiu ne’e mak nia husu ba sidadaun Timor- oan sira atu reza ba ita nia maluk nain 2 ne’e, Governu labele hakat liu ema nia soberania, ne’e limites saida mak sira halo iha Timor ita mak julga sira mos labele mai interven  iha ita nia rai.

Antes ne’e advogadu Jeremias Haekase, hatete dadaun ne’e nia kliente nain rua ho inisial JSP ho AS detein hela iha sela polisia Indonézia Atambua, Belu no autoridade seguransa halo ona teste urin hatudu sinal negativu katak, sidadaun nain rua ne’e la konsumu,maibe lori de’it droga ho tipu ekstasi iha printer laran.

Advogadu nee nia parte garante katak ninia kliente kazál timor-oan nee sei la hetan pena de morte. Kazál timor-oan ne’ebé detein iha sela Belu-Atambua, tanba deskonfia hatama droga, iha loron 29 fulan Maiu tinan ne’e,ho tipu extasi  musan 4.874, husi Timor Leste, ba Atambua Indonézia, liu husi liña fronteira Mota Ain.

Droga hirak ne’e detekta, husi X-RAY, servisu Alfândega NTT iha fronteira Motain.Tos