Defeza Lúcia Lobato hatama rekursu kontra desizaun TR

Defensór Públiku husi kondenada Lúcia Lobato no Helena Madeira Gomes, iha loron Sesta (26/7/19) mais ou menus tuku 14:00 lorokraik hatama ona rekursu ba Tribunal Rekursu (TR) hodi kontra desizaun TR ba primeiru rekursu ne’ebé absolve ona kondenada nain rua husi krime partisipasaun ekonomia no negósiu maibe mantein ho desizaun primeira instánsia Tribunal Distrital Dili (TDD) katak kondenada Lúcia Lobato selu indemnizasaun ho montante millaun USD 124.862,59.

Defensór Públiku husi kondenada nain rua, Juvinal Freitas, hateten kontiudu husi rekursu ne’e husu ba TR atu hare fali ba indemnizasaun ho montante millaun USD 124.862,59, tanba durante julgamentu laiha peritus ruma ne’ebé deskobre konaba prezuizu ne’ebé Estadu hetan.

“Konteúdu husi rekursu ne’e husu atu haree fali ba kondenasaun ou indemnizasaun ne’e, tanba primeiru kondenada Lúcia Lobato moras hela nune’e presiza osan hodi halo tratamentu periodikamente, segundu durante julgamentu lao laiha sasin no peritus ruma ne’ebé deskobre konaba prejuizu ne’ebé Estadu hetan ba hahalok ne’ebé nia halo”,informa Juvinal Freitas ba GMN iha TDD, Tersa (30/7/2019).

Antes ne’e, iha loron 11 fulan ne’e TR hatun desizaun hodi absolve kondenada nain rua husi krime partisipasaun ekonomia no negosiu ne’ebé previstu iha artigu 299 husi kódigu penal Timor-Leste, maibe iha parte seluk TR mos mantein ho desizaun primeira instánsia Tribunal Distrital Dili (TDD) katak kondenada Lúcia Lobato selu indemnizasaun ho montante millaun USD 124.862,59.Ita