Konfrontu iha Liquiça, ema rua mate no uma 13 hetan sunu

Konfrontu entre juventude iha  Adeia Bauro, Suku Leorema, Postu Administrativu Bazartete, Munisípiu Liquiça, Kinta (4/7/19)  tuku 4 lorokraik  OTL, ema rua mate,  nain tolu kanek todan, uma 13 hetan sunu inklui motor 7,  no uma 3 hetan estragus.

“Ha’u atu dehan depois akontesimentu ida  ne’e, responde  kedas  hodi kaptura kedas suspeitu ida  no oras ne’e iha ona sela PNTL Liquiça.  Vítima  sira ne’ebé mak mate  transporta  ona mai iha mortuariu Hospital Nasional Guido Valadares (HNGV), hodi submete  ba autopsia,  enkuantu vitima sira kanek halo  ona tratamentu iha hospital refere”,esplika Komandante Operasionál Nasionál PNTL Superintendente Xefe Pedro Belo, ba jornalista sira, liu husi konferénsia imprensa, Sesta (05/07/19), iha Kuartel Jerál PNTL Díli.

Nia hatutan,   dadauk  ne’e Unidade Espesial Polísia,  iha ona fatin akontesimentu hodi  buka tuir  autor kriminozu  ne’ebé mak involve iha kazu ne’e.

Oras  ne’e dadauk situasaun kontroladu, maibe komunidade barak mak halai  husi sira ninia hela fatin. Tanba  ne’e mak Polísia  Komunitaria  Liquiça fó avizu atu nune’e komunidade ida-idak bele fila-fali ba sira ninia  hela fatin.   Tanba  ne’e, membru Undiade Espesial Polísia ho Polísia sei asegura nafatin fatin akontesimentu.

“Ita hatene katak, horiseik (horibainruak) ne’e  iha tempu de bazár , depois ema hotu iha ne’eba, hodi  mosu problema, maibe motivu lolos ita   entrega ba  servisu investigasaun. Tanba kazu ne’e  agora sei iha hela prosesu investigasaun”,dehan Pedro Belo.

Maibe tuir Pedro Belo,  kazu ne’e deskonfia problema entre Grupu Arte Marsiál balun ne’ebé  mak   governu antes ne’e desidi taka ona.

Tanba suspeitu ne’ebé mak detein líder ida husi  Grupu Arte Marsiál.

“Sé de’it mak involve, ita ténki kaptura  hotu  hodi  ba hatan iha  tribunal”.dehan Pedro Belo.avi