TR anula desizaun ba Emília Pires, Deolindo: Presiza TDD haree fila-fali

Foto:Google

Tribunal Rekursu (TR) desidi anula kazu eis Ministra Finansas (MF), Emília  Pires no husu ba Tribunal Distrital Díli (TDD) atu halo primeira instansia hodi hadi’a prosesu molok foti desizaun definitivu.

“Ha’u labele esplika ba ita boot sira katak, fundamentu ka razaun, tanba saida desizaun ne’e sai hanesan ne’e, ne’e labele, tanba desizaun juíz ni’an, ha’u la komenta opiniaun antisipadamente kona-bá kazu ne’e, kuandu TR anula tiha desizaun ne’e signifika katak, iha buat balun ne’ebé presiza TDD halo primeira instansia, hodi haree fila-fali, para iha buat ne’ebé seidauk loos bele hadi’a halo loos, nune’e dala ida tan kona-bá konteúdu desizaun ne’e nu’udar Prezidenti TR labele esplika ba ita boot sira”, Prezidenti TR, Deolindo dos Santos ba jornalista sira foin la-lais ne’e, iha ninia kna’ar fatin Caicoli-Díli.

Nia esplika, mezmu Emília  Pires laiha Timor-Leste, maibé julgamentu no prosesu kontinua la’o, tanba ninia advogadu ou defensór sira sei iha para reprezenta.

“Ita seidauk bele ko’alia ezekusaun sentensa, tanba seidauk iha desizaun definitivu ba kazu ne’e, agora dau-dauk ne’e ko’alia kona-bá ezekusaun, tanba ema hotu-hotu nia preokupasaun ne’e mak ezekusaun, agora nia laiha ne’e desizaun sai ezekuta halo nusa, maibé ne’e buat seluk ida, kuandu iha ona desizaun definitivu mak bele ko’alia”, haktuir Deolindo dos Santos.

Entretantu tuir fonte konfirmadu katak, TR liu husi juíz kolektivu Jacinta Correia, Duarte Tilman no Natercia Gusmão foti desizaun hodi anula kazu arguida eis MF, Emília  Pires, iha loron 27, fulan Juñu, tuku 05:00 loro-kraik.

“Notifikasaun agora la’o hela, depois notifika hotu TR sei fó Prazu loron 5 nia laran, atu lori fila prosesu ba iha tribunal primeira instansia atu ezekuta”, dehan fonte konfirmadu ne’e.

Antes ne’e, tribunal liu husi primeira instansia desidi aplika pena prizaun tinan 7 ba arguida eis MF, Emília  Pires, tanba komete kazu krimi partisipasaun ekonómia no negósiu. mya