Ekipa Juis-MP halo inspeksaun ba fatin akontesimentu Kuluhun ■Arguido nain rua deklara la tiru

Reprezentante Tribunal Distrital Díli, Juiza Srybuana da Costa, Edite Palmira no Ministériu Públiku (MP) Jacinto  Babo, Defensor Públiku  Estaqui Guterres no Advogado Privadu Pedro Aparicio, hala’o inspeksaun ba fatin akontesimentu kriminal Kuluhun,  ne’ebé mak deskonfia involve eis membru Polísia Nasionál Timor-Leste  nain rua tiru mate mane nain tolu mate no hahakanek  ema nain lima iha fatin refere.

Inspeksaun  ba  lokal de krimi ne’e Kinta (01/08/19),  hetan seguransa masimu husi membru Polísia Nasionál Timor-Leste (PNTL), Eskuadra Nain-Feto.

Alende ne’e,  iha inspeksaun ne’e, marka mós prezensa husi arguidu nain rua  nudar eis membru Polísia ho inisial FMS NO JAP, deskonfia tiru mate  mane nain tolu no hakanek ema nain  lima  iha fatin refere.

“Razaun mai hala’o inspeksaun  iha fatin lokal de krimi ne’e, tanba horseik  liu husi julgamentu  ne’e barak husi defensor rasik inklui Ministériu Públiku no Tribunal rasik ladun apar didiak, entaun defeza rasik inklui ha’u mak husu pedidu ba tribunal hodi halo inspeksaun  iha lokal de krimi  para depois iha hanoin  kona-ba  fatin ne’e para depois  ita  husu pergunta, fasil liu ba ita  bele hola desizaun ba prosesu ida ne’e ”,esplika Defensor Públiku  Estaqui Guterres, ba  jornalista sira, hafoin  hala’o inspeksaun iha fatin refere.

Alende inspeksaun ne’e atu hatene liu vitima sira ninia posizaun no testamuña  idak-idak ninia tuur fatin iha momentu   iha festa laran ne’e tuur iha ne’ebé. Ne’e mak tribunal hakarak atu  marka fali julgamentu 28 iha fulan Agostu tinan ne’e.  Tribunal iha hanoin bele husu pergunta ba testamuña inklui mós vitima sira.

“Krimi ne’e sira nain rua involve iha laran, agora sé mak tiru ida ne’e mak seidauk hatene, tanba  arguido nain rua nega  katak, sira nain rua tiru sae hotu”,dehan  Estaqui Guterres.

Wainhira husu  arguidu nain rua rezeita la tiru será que iha kilat ilegal? Hatan ba kestaun ne’e , Estaqui Guterres hateten, to’o agora  dadauk seidauk iha ema ida mak deklara iha  kilat ilegal, maibe arguidu nain rua deklara momentu lori duni kilat   iha festa laran, sira nain rua tiru ba  terpal leten.

Joven na’in tolu hetan tiru, durante festa koremetan  iha Kuluhun de Baisu-Díli  iha Domingu ne’e mais ou menus  tuku 1:30 madrugada oras Timor-Leste.

 Vítima na’in tolu ne’ebe mak mate hanesan, Erick Joni Roberto Bria tinan 24 kaben na’in, ne’ebe mak hetan tiru iha ulun fatuk,  Luis Quebia Saldanha Belo tinan 18 klosan, no Leonildo Eduardo Ximenes Sequeira tinan 20 klosan.

 Enkuantu vítima na’in lima ne’ebé mak kanek, inklui feto ida Terezinha Vila Nova, iha momentu ne’eba  hetan tiru iha liman lós tohar,  Pinto Gamu hetan tiru iha parte isin kotuk, Agrefino da Costa hetan kanek iha parte hasan no Paulino de Jesus hetan parte kabás, Lucio do Carmo hetan tiru iha kotuk laran.avi