Filomeno Paixão: Membru PNTL ho F-FDTL envolve GAM, sai

Ministru Defeza no Interior Interinu, Filomeno Paixão, hateten, membru Polísia Nasionál Timor-Leste (PNTL) no membru FALINTIL Forsa Defeza Timor-Leste (F-FDTL), ne’ebé mak involve no fasilita membru Grupu Arte Marsiál (GAM) ba hasa’e sintu iha Atambua, Indonézia, sei hasai husi instituisaun.

“Politika hatún tiha ona, sé mak envolve iha arte marsiais ne’e sai, la’os halimar fali. Jura-jura iha fatin ida de’it, la’os ba jura iha fatin rua tolu, ne’ebé agora  sira ne’e hotu tama hotu iha prosesu investigasaun”,esplika Ministru Defeza no Interior Interino Filomeno Paixão, ba  jornalista sira Tersa (20/08/19), hafoin partisipa seremónia komemorasaun loron FALINTIL iha Kuartel Jeneral F-FDTL, Fatuhada, Díli.

Filomeno Paixão akresenta, uluk regulamentu disiplinar PNTL la dún forte atu foti desizaun disiplinar ruma kuandu membru  ruma komete iha GAM ruma.

“Maibe agora regulamentu prontu ona iha ha’u-nia meja hodi hato’o ba  Konsellu Ministru  hodi hatutan ba Konsellu Ministru hodi ba Parlamentu Nasionál. Portantu to’o Komandante  ho Ministru haruka duni sai-sai ona, laiha tan ema ida ba Tribunal. Ba hatán iha tribunal ne’e mak ikun naruk ne’e”,dehan   Filomeno Paixão.

Antes ne’e, Komandante PNTL Unidade Patrullamentu Fronteira, Superintendente João Belo dos Reis, hateten,  identifika ona membru ne’ebé mak fasilita membru GAM ba hasa’e sintu iha Atambua, Indonézia. No kazu ne’e rekomenda ona ba iha Komando Jerál PNTL atu foti medida disiplinar ruma hasoru membru  envolve  iha kazu refere.

Alende ne’e tuir rezolusaun governu númeru 16/2013/ bandu no taka total arte marsiais hanesan Persaudaran Setia Hati Terate (PSHT), Ikatan Kera Sakti (IKS) no Kmanek Oan Rai Klaran (KORK). No reforsa mos ho lei númeru 5/2017 armas brankas nian.

Komandu sei la tolera membru PNTL envolve GAM

Segundu Komandante Polísia Nasionál Timor-Leste (PNTL) Komisáriu Mateus Fernandes hateten, Komandu sei la tolera no se foti medidas forte hasoru membru PNTL ne’ebé mak  fasilita Grupu Arte Marsiál (GAM) ba hasa’e sintu iha Atambua-Indonézia.

“Polisia Nasionál Timor-Leste (PNTL) iha lei propriu ona, se deit mak inklina, impoin fó apoiu ba ema sira seluk para halo buat ilegal prosesu sei kona. Ita boot sira hetene katak sira ne´ebé mak ba sorin sae sabuk ami kaer lubuk ida agora dadauk iha prosesu nia laran”, Segundu Komandante PNTL, Mateus Fenandes, informa asuntu ne’e ba Jornalista sira hafoin ingura Edifisiu Unidade Pesoal Vuneravél iha Komandan PNTL Munisípiu Díli Segunda (19/08/2019).

Mateus Fernandes esplika katak, sira halai liu tiha ba Atambua no adidu polisia iha atanbua sira kaer ema 20 resin tanba laiha pasaporte ne´ebé sira haruka fila fali mai, ne´e sira ne´e mak ba hasae sabuk ne´e.

“Portantu POLRI sira kaptura entrega fali mai Polisia Nasionál Timor-Leste para prosesa tuir lei ne´ebé vigora iha ita nia rai.  Membru sira ne´ebé mak komete sei toma medidas maka´as, medidas ita hotu hatene iha medidas disiplinar, medidas kriminal ba sira”,hatuir nia.

Komandante ne´e mós la esplika detallu membru organizasaun arte-marsiais hira mak sira kaptura no oknum PNTL se-se mak envolve iha aktu ne´e, tanba ne´e nia parte labele esplika detallu ba públiku tanba sei iha hela prosesu investigasaun.Avi/Aes