Xina apoia material lojístika ba F-FDTL

Governu Xina apoia gratuita material lojístika militar ba Falintil-Forsa Defeza Timor-Leste (F-FDTL). Apoiu hirak ne’e mak hanesan kareta  Cozinha iha rua,  sepatu botas 3600,  mala 3600, kama 3600, tenda  80,  armari 180.

Material hirak ne’e, entrega  liu husi seremonia asina akordu, entre Ministru Defeza  no Interior Interinu, Filomeno Paixão no Embaixador  Xina  ba Timor-Leste, Xiao Jianguo, iha Kuartel Jeneral F-FDTL, Fatuhada, Díli Kuarta (14/08/19).

Filomeno Paixão esplika, apoiu ida ne’e, pedidu kleur ona  balun mai kedas tempu eis Ministru Defeza, Cirilo Cristovão. Ne’ebé apoiu ne’e apoiu lojístiku, la’os apoiu puramente militar.

“Felismente apoiu hirak ne’e gratuita ema la husu kondisoins ruma, ha’u haree apoiu ne’e mais ou menus avaliados mínimu  millaun USD 3,  sé koalia em valor  komersial bele to’o USD 5 millaun hanesan ne’e”,esplika Ministru Defeza  no Interior Interinu Filomeno Paixão, ba  jornalista sira iha Kuartel Jeneral F-FDTL Fatuhada, Díli.

Governante ne’e mós apela ba membru F-FDTL sira atu kuida material   hirak ne’e ho didiak atu bele dura ba tempu naruk.

“Tanba Estadu infrenta  buat barak, ita la’os haree de’it  forsa militar ho Polísia de’it, ita haree mós povu nia susar edukasaun,  ita halo uma ba populasaun ne’ebé ita simu ida ne’e  ita sorti boot, hanesan buat ida monu husi Lalehan mai, ne’ebé ita ténki kuidadu fasilidade sira ho diak. Kuandu buat ruma estraga  hanoin a’at pur  neglijensia, entaun ténki halo responsabiliza ba sasan sira ne’e”,dehan Filomeno Paixão.

Alende  ne’e Xefe Estadu Maior Jeneral F-FDTL Major Jeneral F-FDTL Lere Anan Timur  hateten, iha  tempu difisil  Xina rekoñese  independensia Timor-Leste no kondena invazaun Indonézia ba Timor.

“Relasaun ida ne’e ha’u hanoin katak, mais kestaun moral, kestaun amijade entre  dois povu Xina iha dever no obrigasaun  ténki apoiu fó nia suporta Timor-Leste iha área  hotu atu lori povu iha nasaun ida ne’e ba progresu”,dehan Lere Anan Timur.

Antes  ne’e mós governu Xina apoiu ona  kilat boot ho tipu AK 33 ba iha F-FDTL komponente Naval.avi