Disputa rai iha Kaitehu, Pedro rekoñese resibu selu rai tau Mario Belo nia naran

Problema disputa rai entre kompañia Marino Enterprise (ME) no China Harbour ne’ebé lokaliza iha munisípiu Liquiça, área Kaitehu, advogadu privadu husi kompañia ME, Pedro Apariçio rekoñese nota entrega osan ou sosa rai iha rai na’in ho naran Mario Abilio alias Mario Bello, nune’e iha resibu tau deit naran Mario Bello.

“Kwitansi simu no entrega osan ne’e mak tau fali Mario Belo alias Mario Abilio, maibé hanesan deit, tanba laiha efeitu jurídiku, tanba importante mak osan ne’e entrega ba na’in no durante ne’e laiha reklamasaun husi rai na’in no laiha problema”, Pedro Apariçio ba GMN iha Tribunal Distrital Díli (TDD), Kinta (19-09-2019).

Nia esplika, dokumentu sosa no fa’an rai ne’e, primeiru tau naran husi rai na’in Mario Abilio alias Mario Bello, nia nu’udar oan mane husi Abilio Mario, ho razaun tanba Abilio Mario katuas ona.

“Surat kontratu sosa no fa’an, klaru inklui medida rai ne’e mak hanesan 1.9 hektares, maibé dokumentu sosa no fa’an mak iha rua, tanba primeiru sosa iha tinan 2017 ne’e, tau rai na’in Mario Abilio alias Mario Bello nia naran, nu’udar oan mane husi Abilio Mario, ho razaun tanba Abilio Mario katuas ona, segundu kontratu sosa no fa’an iha notariadu, iha loron 21, fulan Marsu, tinan 2019, troka fali ba Abilio Mario nia naran hodi hanehan liman”, informa Advogadu Privadu husi kompañia ME.

Alende ne’e, nia parte mos rekoñese hatama dokumentu sala ba parte Sistema Nacional de Cadastro (SNC), relasiona ho identidade husi rai na’in ni’an. ita