Filomeno Paixão: PNTL sei revé estratejia operasionál ■Husu membru sira hakruk ba hirarkia

Ministru  Defeza no Interior  Interinu,  Filomeno Paixão, hatete, Governu sei revé estratejia operasionál atu redus kazu  krimi ne’ebé mak akontese  iha teritóriu nasionál partikularmente iha kapital Díli.

“Sim. Ha’u la’os dehan máximu, mas ha’u mós la dehan mínimu, Polísia halo patrullamentu durante ne’e,  klaru ida ne’ebá (kazu omisidiu Ai-Mutin) hanesan dezastre ida,  ha’u dehan tiha  ona  ha’u la espera, ami hotu la espera. Ba oin, ha’u koalia ho  komandante sira. Alende   ita rona ema koalia, ita  mós tuur hanoin ita mós halo sala ruma karik, ba oin ita tuur hadia a’an. Ohin (Horiseik) ha’u koalia hotu sira ne’e, polítika governu, komando atu revé estratejia  hodi halo diak liu  bele  iha liu  vizibilidade kontrolu liu ba iha Díli”,esplika   Ministru  Defeza Interior  Interinu, Filomeno Paixão, ba  jornalista sira, Kinta (26/09/19), relasiona ho preokupasaun deputadu sira iha Parlamentu Nasionál ne’ebé konsidera, kazu omisidiu foin lalais akontese rezulta  joven  ida mate ne’e,  tanba Polísia  falla iha vizibilidade.

Konfrontasaun foin lalais entre joven sira iha Aimutin, rezulta   Ivon da Silva,  orijinária husi Postu administrativu Maubessi, munisípiu Ainaro nian ida mate,  ema nain rua kanek todan.           Iha  akontesimentu refere, Polísia eskuadra Dom  Aleixo detein suspeitu nain rua iha sela Polísia,  iha Kinta loron 26 fulan Setembru ne’e submete ona ba primeiru interogatóriu iha Tribunal Distrital Díli.

Ministru  Defeza no Interior  Interinu,  Filomeno Paixão, mos husu ba membru Polísia Nasionál Timor-Leste (PNTL), atu hatudu disiplina no  hakruk ba hirarkia komando.

“Ha’u sempre  organiza  enkontru  ne’e koalia  hamutuk  fó esplikasaun liu-liu kona-ba politika  oitavu governu konstituisional. Periodade   ne’ebé mak oitavu governu ba  iha  polísia,  bolu mós fó hanoin malu,  kona-ba disiplina, kona-ba hirarkia,  tantu prosedimentu seluk ne’ebé mak halo hodi  polísia servisu  bele la’o diak liu tan”,Filomeno Paixão,  hafoin ekontru ho komandante Polísia 12 no komandante Polísia,  Rejiaun Administrativa Espesial Oecussi Ambeno,  iha Kuartel jerál Polísia Kaikoli Díli.

Alíende ne’e marka prezensa iha enkontru ne’e, Komandante Jerál PNTL Komisariu Faustino da Costa, ho Segundu  Komandante  Jerál PNTL Komisariu Mateus Fernandes.avi