KAK prontu apoia Governu kombate korupsaun

Komisaun Anti Korupsaun (KAK), prontu apoia polítika VIII Governu nian hodi kombate korupsaun iha Timor-Leste (TL).

“Enkontru ohin organiza husi Gabinete Ministériu Reforma Lejislativa no Asuntu Parlamentar (MRLAP) nian, ho objetivu prinsipal ha’u atu mai atu bele partila informasaun ba maluk sira hamutuk ho sosiedade sivíl, relativamente ita atu hanoin oinsa mak ita haree kona ba polítika ba iha kombate korupsaun ninian”, hatete Komisáriu Anti Korupsaun  (KAK), Sergio Hornai ba jornalista sira iha Palásiu Governu, hafoin remata enkontru ho Ministru MRLAP, Kuarta  (17/09).

Nia hatutan, tanba  ema hotu katak,   MRLAP nu’udar hanesan instituisaun Estadu ninian,  MRLAP mak iha kompetensia atu haree reforma ba iha instituisaun Estadu nian  karik presiza, no mós  halo reforma ba iha lei balun ne’ebé atu presiza halo reforma para halo ajustamentu, no KAK fó hanoin prespetiva KAK nian  iha ámbitu oinsa mak atu bele hametin instituisaun ne’ebé mak ezistente iha ona, no halo miloramentu ba iha ninia diferensia  ne’ebé mak iha atu bele kompleta  hodi nune’e bele hametin liutan instituisaun.

 “Depois ida seluk mak, ita foin fase liu oinsa mak atu hasai integridade, liu-liu iha parte setór  públiku no mós privadu nian, no  iha parte seluk mak ita presiza  hametin kooperasaun  intitusional atu bele detekta potensia sira ne’ebé mak bele posibilidade  lori ita  ba iha risku,  intermus jestaun ne’ebé mak ita hotu hakarak,  jestaun ba iha boa-governasaun nian”, relata Sergio.

Iha fatin hanesan, reprezentante ONG FONGTIL, Manuel  Simeon,  hatete, enkontru ohin loron nian oinsa  mak MRLAP ho sosiedade sivíl FONGTIL bele organiza nia membru  sira atu diskuti kona ba isu temátiku sira.

“Atu halo diskusaun  kona ba isu temátiku sira,  mak ohin loron nian oinsa bele halo prevensaun ba korupsaun”, katak Manuel.aba