KomJer PNTL dezloka ona ekipa halo investigasaun ba kazu agresaun fíziku iha Baucau

Komandante Jerál Polísia Nasionál Timor-Leste (PNTL), Komisariu Faustino da Costa  hateten komandu jerál dezloka ona ekipa atu halo investigasaun imediata ba kazu agresaun fíziku hasoru sidadaun ida iha munisípiu Baucau. 

Komandante Jerál PNTL, Komisariu Faustino da Costa hato’o asuntu ne’e hafoin hala’o sorumutuk ho prezidente  Republika  Francisco Guterres ‘Lú Olo’ iha Palasiu Prezidensál Nicolau Lobatu Bairo Pité, Díli, Kinta (05/09/2019).

Durante hasoru malu ho xefe estadu, Faustino informa konaba situasaun iha Baucau, liliu kazu membru PNTL husi Komando Baukau ne’ebé deskonfia  baku sidadaun ida iha loron 02 fulan Setembru ne’e.

Faustino informa,  komandu jerál hasai ona despaixu hodi dezloka ekipa ida ba Munisipiu Baucau atu halo investigasaun imediatu no klean konaba akontesementu ne’e refere.

“Ami aktualiza mos konaba situasaun iha Baucau iha dia 02 ninian, ami mos informa ida ne’e katak relatóriu kompletu mai husi Baucau, e la’os mai husi komandu PNTL deit maibe ho komandante komponente terrestre halo ona relatoriu konaba akontesementu ne’e mai, e ita mos hato’o tiha ona ba Ministru. Operasaun ne’e la’os PNTL mesak maibe ne’e operasaun konjunta, e eventu FND (fetival nasional desportu) ne’e la’os Baucau mesak maibe inklui ema husi munisipiu hotu iha ne’eba (Baucau), entaun komandu hasai ona despaixu ida hodi dezloka imediatu ekipa ida husi komandu jerál ba Baucau atu halo investigasaun klean konaba akontesementu ne’e,” hateten Komandante Jerál PNTL, Komisariu Faustino Da Costa.

Antes ne’e mos Ministru Defesa no Interior Interinu lamenta ho atuasaun membru PNTL   husi komando Munisipiu Baucau ne’ebé deskonfia baku sidadaun ida iha Baucau.

Tanba tuir Filomeno Paixão bainhira polísia kaptura ema ruma ne’ebé halo krime  tau aljema iha liman   hodi  ba detein   iha sela polísia, hafoin submete ba iha tribunal la’os    polísia ba halo atuasaun no violasaun hasoru komunidade.Ito