Membru Polísia 203 komete violasaun direitu umanu

Prevedora Direitu Umanu  no Justisa (PDHJ-sigla Portugés), Jesuina Maria, hateten, tuir sira-nia baze dadus, rejista membru Polísia Nasional Timor-Leste (PNTL) hamutuk 203 komete ona violasaun direitu umanu.

“Tuir  ami-nia baze de dadus  hahú iha tinan 2006 to’o 2019 iha membru PNTL hamutuk 203, mak  komete  ona violasaun direitu umanu”,esplika Jesuina Maria ba  jornalista sira Tersa (24/09/19) iha  Timor-Plaza hafoin partisipa semináriu nasionál  ba superior  sira iha instituisaun  PNTL iha Timor-Plaza.

Jesuina dehan,   tipu  violasaun  kazu  ne’ebé membru Polísia komete mak violasaun direitu ba liberdade seguransa  no integridade liga ba tratamentu  komunidade.

“Ami konklui tiha ona  prosesu  investigasaun, ami rekomenda ba iha komando jerál PNTL, liu-liu liga ba membru sira ne’ebé komete  violasaun direitus humanus. Iha relatóriu  ne’e ami halo mós rekomendasaun  ba komando jerál para foti prosesu disiplinar”,dehan Jesuina Maria.

Alíende  ne’e, Ministru Defeza  no Interior Interinu Filomeno Paixão, husu  membru Polísia atu hapara baku komunidade.

“PNTL ba   halo atuasaun presiza  proteje  populasaun, labele halo ema tauk fali ita.Tan ne’e PNTL ténki diak para ema respeitu tau matan ba komunidade”,dehan Filomeno Paixão.

Nune’e mós Komadante Jerál PNTL Komisariu Faustino da Costa hateten,    governu presiza halo revizaun ba lei organika PNTL hodi fó kompetensia  ba  komando foti medida  ba nia membru Polísia, wainhira komete violasaun ruma.

“Ita  bo’ot sira akompaña señor ministru  defeza interior Interinu Filomeno Paixão mós koalia asuntu refere.Tan  ne’e mak esperansa Komando nian mak ne’e. Ho eventu semináriu   nasionál  ba superior PNTL ida ne’e. Tanba  koordenasaun komando PNTL ho PDHJ halo diskusaun ho komando jerál PNTL rasik,   ne’e mak ita realize aktividade semináriu ne’e”,dehan Faustino da Costa.

Tuir misaun PNTL maka forsa Siguransa ida ne’ebé atu defende legalidade demokratiku hodi garante seguransa ba sidadaun Timor-Leste no asegura direitu sidadaun tuir Konstituisaun RDTL  artigo. 147 no lei organiku 09/2009 artigu 1.2. no Misaun Polísia Komunitária tuir artigo 18 lei organika da PNTL.avi