XANANA HIRUS TRIBUNAL TANBA TAKA DALAN BA FATIN DULAS FATUK IHA LIQUIÇA

Eis Primeiru Ministru, Kay Rala Xanana Gusmão, hirus no hato’o nia lamentasaun kona ba problema rai entre kompañia Marino Enterprise no China Harbour,  ne’ebé Kompañia  Marino Enterprise hato’o keixa ba tribunal hodi taka dalan ba fatin ne’ebé kompañia China Harbour dulas fatuk ba konstrusaun portu Tibar.

Xanana Gusmão ho ran nakali sobu lutu ne’ebé Tribunal taka atu kompañia China Harbour labele dulas fatuk, no fó orientasaun ba traballador sira husi kompañia China Harbour atu kontinua sira nia servisu, tanba portu Tibar ne’e harii ba povu Timor-Leste tomak.

“Lalika halimar ho ha’u, ha’u prontu para kadeia, tribunal hakarak mai kaer ha’u, ha’u mak ne’e, ha’u prontu ba kadeia, tanba portu tibar ne’e la’os ba ha’u, la’os hotel ida ha’u atu hela, ho tribunal nia hahalok ne’e mak supply base iha Suai nunka mais la’o, ita tenki hahú foun, tanba ne’e Zuis sira ne’ebé ha’u hakruk tebes, tanba sira mak mesak matenek deit, ha’u husu deskulpa maibé, kona ba ida ne’e ha’u sei la premite”, lamenta Xanana ba Jornalista sira, Tersa (10 / 09 /2019) iha Munisípiu Liquiça.

Nia akresenta nia sei la hasoru Tribunal hodi ko’alia kona ba problema ne’e maibé nia hakarak atu tribunal hasoru direta nia to’o kaer lori ba prizaun Bekora.

“Tribunal hakarak mai kaer ha’u, tanba kompañia China Harbour la iha kulpa buat ida  maibé, tribunal hatudu katak, nu’udar instituisaun Estadu hatene saida mak interese nasional, no saida mak interese pessoal, ha’u fiar katak, Marino Enterprise katak, Enterprise ba sogok tiha sira ona, ha’u prontu atu tribunal mai kaer ha’u, lalika halimar ho ha’u”, lamenta Xanana.

Lider rezistensia ne’e salienta,  nia kuñese kompañia Marino Enterprise ne’ebé ema Timor-oan, tanba  nain ema Maubise, tanba ne’e Xanana hakarak atu Sekretariadu Terras no Propriedade hatudu ba nia, kompañia ne’e sosa rai refere hodi bainhira, no sosa ba  se, tanba nia mós ko’alia ona ho rai na’in ne’ebé fa’an ona rai ne’e ba Marinu Enterprise.

“Ha’u hatene Marino Enterprise seluk rai na’in ne’ebé fa’an rai ba nia, ho  montante orsamentu rihun USD 15, ha’u  fó osan USD 15.000 fila fali ba kompañia ne’e, tanba  problema ida ne’e, la’os mai fali aproveita, atu halo konstrusaun ba portu hodi ba esplora ne’e lae, ne’eduni ida ne’e ha’u aviza ba tribunal, hakarak ha’u lalika ba julgamentu maibé, lori deit ha’u  ba kadeia ha’u simu”, subliña Xanana.oly