Ema tuda rahun kareta ida iha bairu My Friend “PNTL labele koalia situasaun normal”

Konfrontu entre joven sira  iha bairu my friend,  rezulta kareta  Fortuna ida ho sapa matríkula 29-853 TL vidru kotuk rahun total.

Insidente  ne’e akontese Sábadu  semana  ne’e, mais ou menus tuku 5 lorokraik, oras Timor-Leste iha bairu my friend, aldeia Donogi, suku Santa Cruz, postu administrativu Na’i-Feto munisípiu Díli.

Hafoin akontese  tiha tuda malu  entre  joven sira, Polísia foin too iha fatin akontesimentu,  maibé  joven sira mak  involve iha kazu ne’e halai subar a’an ona.

“Tanba  ne’e Polísia sira haruka ha’u ba  hato’o keisa, hafoin Polísia sira loke camera Closed Circuit Television  (CC-TV), hodi haree. Ha’u la kompriende, ha’u atu keisa sé”,esplika kareta nain Celestino  da Costa Alves, ba  jornalista sira Segunda (14/10/19), iha  bairu my friend,  Díli.

 Celestino  akresenta,  iha akontesimentu  ne’e la rezulta ema ruma kanek, maibé nia lamenta atetude  suspeitu sira  ne’ebé mak tuda rahun vidru  kareta ne’e.

“Ha’u só hateten hanesan ne’e de’it, ha’u sei lori ba natureza, sé de’it mak tuda, mai iha ne’e  intrega a’an  hodi koalia ho lolos, sé  lae sir abele mós hotu”,dehan  Celestino  da Costa Alves.

Iha parte seluk Xefe Suku Komoro Eurico da Costa de Jesus,  preokupa  servisu Polísia munisípiu Díli,   ne’ebé mak halo atuasaun tarde ba konflitu entre joven sira   iha bairu eskola  30   no  bairu  Moris-Foun

Maske ho akontesimentu hirak ne’e  komando PNTL munisípiu Díli konsidera problema  kikoan la fó  impaktu ba estabilidade iha rai laran.  Tan  Eurico da Costa de Jesus,  preokupa ho estetementu  komando PNTL munisípiu Díli nian.

“Komandante hanesan ema armada kaer armas nia koalia gampang, agora ha’u hanesan Xefe Suku, laiha  armas, maibé ha’u  iha hanoin ida de’it  oinsá  atu  halo situasaun ne’e hakmatek, ne’ebé ha’u hare’e problema  ne’e ba ha’u la normal ida”,dehan  Eurico da Costa de Jesus.

Nia hatutan,   bainhira  komandante  temi situasaun normal,  hare’e took situasaun ne’e oinsá, situasaun ida rungu ranga hanesan ne’e fó pâniku ba ema, ne’e la’os normal.

“Ita ténki fó atensaun dia efikas  ba  prosesu sira hanesan  ne’e, agora  kaer tiha suspeitu sira ba sulan iha sela,  la investiga husik fali labarik sira,  wainhira sira fila baku malu nafatin de’it”,dehan   Eurico da Costa de Jesus.

To’o notisia ne’e  publika GMN seidauk hetan konfirmasaun husi parte komando PNTL munisípiu Díli.avi