Falta kolaborasaun ho DNTP, TDD suspende kazu disputa rai iha Kaitehu

Rekerente Pedro Apariçio, hateten, prosesu ba kazu disputa rai iha Kaitehu, munisípiu Liquiça, Tribunal Distrital Díli (TDD) sei suspende, tanba falta kolaborasaun Diresaun Nacional Terras no Proprieridade (DNTP).

“Ita nia governu ou Estadu halo intervensaun, tanba iha prosesu ida ne’e, maibé tribunal husu ba Terras Propriedade para bele junta dokumentu kona-bá mapa lokalizasaun terenu no mós rai komunidade sira nia ne’ebé mak uluk kuando Sistema Nacional de Cadastro (SNC) sukat hotu ona no iha ninia númeru rejistu, no númeru lokalizasaun, ida ne’e maka Terras Propriedade tenki hatama ba tribunal, maibé ate a data tribunal seidauk simu dokumentu mapa lokalizasaun sira ne’e”, Rekerente ne’e ba jornalista sira iha TDD, Tersa (29-10-2019).

Nia esplika, loloos ne’e TDD foti desizaun uluk ba intervensaun husi Estadu ba problema disputa rai iha Kaitehu ne’e, loos ka sala.

“Atu hateten antes ami ko’alia no desidi kona-bá prosesu restituisaun  provizoria de posse entre Marino Enterpraise ho China Harbour, ne’e tribunal tenki desidi uluk lai intervensaun husi Estadu ne’e loos ka sala no iha razaun ka laiha, maibé tribunal mós husu ona ba Terras Propriedade atu kompleta dokumentu, maibé to’o agora seidauk kompleta”, tenik Pedro Apariçio.

Nia akresenta, kuandu dokumentu sira ne’e submete ona ba tribunal, tribunal hahú halo julgamentu ba prosesu entre kompañia Marino Enterprise ho Estadu.

“Hafoin prosesu ida ne’e, kuandu tribunal sei indefere pedidu embargo husi Estadu, husi ne’e mak tama fali ba prosesu ba kompañia China Harbour, nune’e iha ne’e iha ema na’in tolu maka sai hanesan parte ba prosesu ida ne’e, parte rekeridu mós hatama rekerementu, sira eziji ba tribunal, tanba tenki rejolve uluk lai embargo treseiru husi Estadu, tribunal tenki desidi uluk ema halo intervesaun ne’e iha lejitimidade ka la’e, maibé to’o agora seidauk kompleta dokumentu, tanba ne’e maka julgamentu ne’e labele kontinua no tribunal desidi suspende”, subliña Rekerente Pedro.

Relasiona ho kestaun ne’e, TDD sei fó prazu loron 5 ba DNTP, atu kompleta dokumentu ba TDD.

Audénsia ba julgamentu ne’e, prezidi husi juíza, Maria Modesta, rekeridu, José Teixeira, rekerente, Pedro Apariçio no advogadu privadu sira. mya