Konfrontu iha Mascarinhas, Janela eskola UNDIL nian rahun inklui uma abitante ida

Konfrontu entre estudante Universidade Díli (UNDIL) ho ema liur iha Suku Mascarinhas, Segunda (14/10/19), rezulta janela rua eskola  Universidade  Díli (UNDIL) nian rahun inklui uma abitante ida nian mos rahun hotu.

Kazu  ne’e akontese mais ou menus tuku  rua, lorokraik oras Timor-Leste.

Iha akontesimentu ne’e, Polísia ho FALINTIL Forsa Defeza Timor-Leste (F-FDDTL) tuun kedas  iha fatin akontesimentu hodi halo atuasaun no normaliza situasaun, nune’e Polísia    asegura estudante  ida  hodi ba kareta lori ba eskuadra Polísia Verra-Cruz, Munisípiu Díli hodi husu informasaun.

“Ha’u  simu informasaun husi komunidade katak, ema tuda malu iha iha estrada,  depois ha’u  sai husi uma mai liur,  estudante sira tuda husi kamapus, entaun identifika problema ne’e husi estudante mak duni malu sai liur hodi tuda malu, depois  komunidade nia uma barak mak hetan tuda, maibe abitante ida nia uma mak vidru  janela rahun”, esplika  Xefe Suku Mascarinhas, Rui Ilídio de Araújo,  ba  GMN Segunda (14/10/19), iha Mascarinhas.

Ho akontesimentu ne’e, Rui Ilídio de Araújo, lamenta tebes no kondena reitor sira.

“Ha’u kondena maka’as reitor sira, sira  ne’ebé mak harii universidade ne’e,  la tau atensaun ba atitude sira hanesan ne’e, tanba sira halo  problema ho ema Mascarinhas fila-fila ona”, dehan  Rui Ilidio de Araújo.

Iha parte seluk  Vise Reitor  asuntu estudante UNDIL Cesaltina Ángela, la fó esplikasaun kompleta ba kazu ne’e, tanba sei hein  superior sira.

“Spontania  ne’ebé mak akontese iha universidade ami seidauk bele fó deklarasaun,tanba  sei hein hela ami nia superior sira tuur hamutuk lai haree situasaun ida ne’e. Ohin  estudante   ne’ebé mak halo perturbasaun iha kampus  ne’e sei iha  prosesu investigasaun hela iha Polísia, bainhira mai hotu mak ami fó”,dehan

Iha akontesimentu ne’e, tuda malu ne’e la rezulta   ema ruma kanek, maibé uma abitante  ida mak  hetan estragus  inklui vidru janela eskola universidade nian.avi