Lere: Rekrutamentu F-FDTL foun, Milísia nia oan la tama

Xefe Estadu Maior Jenerál F-FDTL, Major Jenerál Lere Anan Timur,  hateten kritériu rigorozu ba rekrutamentu membru F-FDTL foun no proibe milísia nia oan tama F-FDTL. 

Xefe Estadu Maior Jenerál F-FDTL, Major Jenerál Lere Anan Timur, informa kestaun ne’e ba Jornalista sira hafoin enkontru regular ho Prezidente da Repúblika, iha Palasiu Prezidensiál Nicolau Lobato Bairo Píte, Díli, Kuarta (16/10/2019).

Durante hasoru malu, Xefe Estadu Maior Jenerál F-FDTL, Major Jenerál Lere Anan Timur informa ba xefe estadu Timor-Leste, konaba rekrutamentu mebru foun F-FDT ne’ebe sei akontese iha tinan oin.

Nune’e komandu istituisaun F-FDTL hahú forma ona ekipa ba rekrutamentu no fó prioridade ba veteranus ho ema rezistensia nia oan atu garante nasionalista no patriotismu núdar lutu nasaun nian.

“Primeiru ami forma ona ekipa de rekrutamentu, fó prioridade ba veteranus ho ema rezistensia nia oan e ne’e prioritáriu no segundu tenke hatene kada rekruta ninia inan-aman ne’e moris iha ne’ebe, tanba dala ruma iha oan balu ninia inan-aman iha Atambua ne’eba e sira haruka mai iha ne’e atu kria kondisoens sé hakarak Timor entaun Timor oan lolos  no labele fahe ba rua.  Sé inan-aman iha Atambua, pasiensia ita labele sai forsas armadas tanba inan aman iha hela sorin. Ita la fo sala ba oan maibe atu manan sentidu de nasionalista diak no patriotismu, porque atu sai militar ne’e lutu ba nasaun, atu defende soberania nasaun ninian e ne’e mak rekrutamentu ida ne’e tenke reguroju oituan, tenke husu tuir,” hateten Xefe Estadu Maior Jenerál F-FDTL, MAJOR JENERÁL Lere Anan Timur.

Antes ne’e Vise Xefe Estadu Maior Jeneral F-FDTL, Brigadeiru Jeneral Falur Rate Laek hateten instituisaun F-FDTL servisu hamutuk ho ministériu defeza hodi fó susesu ba prosesu rekrutamentu iha ne’ebe tuir planu sei rekruta membru F-FDTL foun hamutuk na’in atus neen (600). Ito