TDD adia julgamentu kazu eis Ministru Administrasaun Estatal

Tribunal Distrital Díli (TDD) adia fali julgamentu kazu ne’ebé komete husi arguidu AJGL hanesan eis Ministru Administrasaun Estatal (MAE) no mós arguidu nen (6) seluk, tanba juíz prosesu seidauk estuda di-di’ak prosesu ne’e.

Tuir ajenda, iha loron 14, fulan  ne’e, TDD halo primeiru julgamentu ba eis MAE ho inisal AJGL, inklui arguidu na’in hira seluk ne’e, nune’e julgamnetu ne’e adia fali ba loron seluk, sein data, maibé depois mak tribunal notifika parte sira hotu.

Razaun TDD adia, tanba prosesu ne’ebé antes ne’e iha juíz prosesu Eusebio Xavier maka ka’er, maibé agora dau-daun ne’e, ba fali iha juíz ne’ebé substitui juíz prosesu, Maria Solana, nune’e seidauk estuda prosesu sira ne’e.

Arguidu na’in hitu ne’e, deskonfia komete kazu krimi administrasaun da noza, ne’ebé previstu iha artigu 274, partisipasaun ekonómia no negósiu, ne’ebé previstu iha artigu 299 no mós burla agravadu, previstu iha artigu 267, husi kódigu penal Timor-Leste.

Tuir akuzasaun husi MP ne’ebé aprezenta ba TDD Lee sai, arguidu ho inisial AUF, iha tinan 2010 asumi kargu hanesan Diretor Administrasaun no finansas Ministériu Administrasaun Estatal no Ordenamentu Teritorial (MAEOT).

Arguidu RAV, iha tinan 2010 asumi kargu hanesan Diretor Diresaun Nasional Edifikasaun Habilitasaun no Planeamentu Urbanu (DNEHPU), arguidu AJGL, iha tinan 2010 asumi kargu hanesan Ministru Administrasaun Estatal no Ordenamentu Teritorial (MAEOT).

 Arguidu sira ne’e deskonfia komete krimi relasiona ho konstrusaun edifísiu foun munisípiu Baucau, Dezeñu ba konstrusaun edifísiu husi empreza Decons Unipessoal. Lda no hetan aprovasaun husi RAV ho montante USD999,610.02.

Arguidu FM maka hanesan Diretor ba empreza Lifau Indah Unipessoal. Lda no sai hanesan manan na’in ba konstrusaun edifísiu foun iha Oe-Cusse.

Iha loron 23, fulan Jullu, tinan 2009, Estadu RDTL asina kontratu ho valor USD744, 643.90. Ho valor ne’ebé la hanesan iha estimasaun Bill of Quantity (BOQ) inísiu.

Ho konstrusaun ba Edifísiu rua ne’e, mak mosu erru balun, hodi deskonfia arguidu na’in 3, ho inisial DM, MFICBEB no F komete krimi tolu, husi kódigu penal Timor-Leste.

Audénsia julgamentu ne’e, prezidi husi juíz, Maria Solana, Ministériu Públiku (MP) reprezenta husi prokuradora, Lídia Soares, arguidu sira hetan asisténsia legal husi advogada privada. mya