Usa sala poder hodi taka sala, Oknum Polísia tuku motorista ida to’o matan nakles

Oknum Polísia Nasional Timor-Leste (PNTL),   deskonfia  tuku no  tebe motorista  mikrolete ida ho naran kompletu  Samuel da Costa to’o matan fukun nakles, hodi taka nia sala ba motorist Samuel da Costa ne’e.

Kazu  ne’e akontese iha Lahane Osidental Postu Administrativu Vera-Cruz, Munisípiu Díli, Segunda (30/09//19),  mais ou menus tuku 10:00   dadersan oras Timor-Leste.

Vítima Samuel  da Costa haktuir kronolojia husi akontesimentu ne’e katak,  kazu ne’e akontese wainhira nia kondus kareta   tula  pasajeirus husi  dirésaun  terminal Taibesse atu liu ba Bidau  maibé, to’o iha rotunda Lahane nian membru Polísia ida kondus  kareta privadu  ho tipu Avanza koor  azul, soke vítima  nia kareta husi kotuk.   Ho asidente trâfegu  ne’e,  oknum  ne’e tu’un husi  nia kareta  baku kedas vítima ne’e.

“Akontese tiha asidente  trâfegu ne’e oknum Polísia ne’e dehan o hadia o nia kareta ba, depois oknum polísia ne’e dehan tan, tempu ha’u jaga ha’u hetan o mós ha’u baku nafatin. Ne’e mak ha’u la simu nia liafuan  ne’e, entaun ha’u   ba  atu  hato’o keixa iha Eskuadra Polísia Nain-Feto maibé, Polísia sira haruka ha’u ba iha PNTL Kaikoli maibé,  Polísia sira kontinua haruka ha’u ba keixa iha nasionál, ne’ebé ha’u keixa tiha ona, hein de’it sira kontaktu ha’u via telefone”, esplika vítima Samuel  da Costa, ba   jornalista sira Segunda (01/10/19), iha  terminal merkadu Taibessi.

Alíende   ne’e,  Responsavel Assosiasaun  Kondutores  Munisípiu Díli, Egas  Ximenes da Costa, lamenta tebes ho atetude oknum Polísia  ne’ebé uza  nia poder  pesoal   hodi halo agresaun  fíziku   hasoru    motorista Samuel.

 “Tanba    ne’e ami   husu  ba ministériu  relevante  no órgaun  kompetente  hodi toma   atensaun  sériu  ba akontesimentu ne’e, sei karik  kazu ne’e  ne’e mak trata la tuir  prosesu legal, ami  prontu  atu prosesa  kazu ne’e  tuir dalan legal, hodi nune’e   ami nu’udar   povu   bele senti  katak, lei   ne’ebé vigora  iha konstituisaun RDTL   funsiona ba sidadaun hotu”,dehan Egas  Ximenes da Costa.avi