Kna’ar KPK la’os halo atuasaun ba suspeitu

Segundu Komandante  Polísia Nasionál Timor-Leste (PNTL) munisípiu Díli Superintendente Assistente Euclides Belo hateten,  kna’ar   membru Konsellu Polísiamentu Komunitária la’os halo atuasaun   ba suspeitu sira,  maibé  buka  atu identifika problema iha sira-nia Suku.

“Ha’u atu dehan Polísia de’it mak halo atuasaun ba suspeitu sira membru KPK sira só ajuda PNTL halo identifikasaun  no fahe informasaun ba prevensaun krimi nian, liu husi Xefe Suku, liu husi Ofisial Polísia Suku  no komandante Eskuadra sira oinsa bele halo prevensaun diak liu  iha Suku ida-dak nian”,esplika Segundu Komandante  PNTL munisípiu Díli Superintendente Assistente Euclides Belo, ba  jornalista sira Kuarta (13/11/19), iha Kuartel PNTL  Caicoli Díli.

Alende  ne’e   KPK Grisenfor ,   husi Akadiruhun B no  Suku Bidau Licidere hamutuk 75 tuir formasaun, oinsa  bele fó apoiu servisu PNTL  diak liu iha terenu.

Formasaun ne’e hanorin husi  membru Polísia Komunitaria munisípiu Díli no  Polísiamentu komunitaria  husi kontijenti jerál.

Formasaun ne’e hala’o  iha salaun enkontru Kuartel  PNTL muníspiu Díli (13/11/19) .

“Ami fó formasaun  KPK husi KPK Grisenfor ,   husi Akadiruhun B no  Suku Bidaun Licidere. Tanba  antes  tama  tinan foun ne’e  estrtura KPK  iha Díli laran ne’e ténki estabelese  hotu kedas”,dehan Euclides Belo.

 Materia ba formasaun sira ne’e mak kona-ba  manual  KPK sira nian oinsá mak sira bele apoiu servisu PNTL hodi halo identifikasaun  ba problema no halo prevensaun iha sira nia suku hodi kria  paz no estabilidade iha sira nia Suku rasik.

Alende  ne’e Xefe Suku Bidau Lecidere,  Luis  Rebelo Soares Pereira, konsidera formasaun ne’e  importante tebes.

“Ha’u garante katak, bainhira membru KPK  tuir formasaun remata tiha, sira sei identifika problema sira iha Suku laran  hodi informa ba Polísia,  buka resolve no  problema criminal informa Polísia atu bele halo kapturasaun”, dehan   Luis  Rebelo Soares Pereira.

KPK forma  husi Komando jerál PNTL   no sira hala’o servisu volontáriu la hetan intensivu ruma husi governu.avi