UPF prende tan atributu PSHT

Membru Unidade Patrullamentu Fronteira (UPF) prende  tan atributu  eis arte marsiais Persaudaraan Setia Hati Terate (PSHT), no detein  suspeitu ida iha Mota-Ain, Munisípiu Bobonaro.

Atributu sira ne´e prende iha loron  Domingu (03/11/19)  husi sidadaun ida,  bainhira  detekta husi makina X-Ray  Alfándega iha fronteira Mota-Ain. Antes ne’e UPF mos prende ona atributu PSHT iha Mota-Ain.

Kazu  ne´e iha hela prosesu  investigasaun no entrega ona ba Ministériu Públiku.

“Atu informa de´it katak, atividade  operasaun durante loron finadu, primeiru pontu mak ami back up komando PNTL munisípiu Bobonaro, Covalima, Oecussi, iha liña  fronteira, segundu mak ami halo  operasaun rutina. Ami  back up  komando PNTL Bobonaro hodi halo atuasaun ba konfrontu eis arte marisiais  iha Duaderok  iha Suku Leolima, Balibo Bobonaro, to’o agora ami nia ekipa  kontinua destaka iha ne´ebá. Parte seluk  ami prende atributu eis artemarsiais PSHT nian kuaze 30 pares  iha Mota-Ain“,esplika Komandante Unidade Patrullamentu Fronteira Superintendente João Belo  dos Reis, ba jornalista sira Segunda (04/11/19), iha Kuartel Jerál PNTL Kaikoli Díli.

Alende  rezolusaun  governu númeru 16 / 2013/ bandu no   taka arte marsiais hanesan PSHT  no Ikatan Kera Sakti (IKS) inklui  Kmanek Oan Rai  Klaran (KORK), iha Timor-Leste. No reforsa lei númeru 5/2017, armas brankas hodi fo  forsa ba Polísia hodi kontrola eis artemarsiais,  ne´ebé sei kontinua treinu subar-subar no  nia atributu sira.avi