Ema sona joven rua iha Comoro ■ PN ezije PNTL garante estabilidade

Joven  nain rua  hetan sona iha  área Golgota no Kampung Baru Suku Komoro, Postu Administrativu Dom Aleixo, munisípiu Díli, Tersa (24/12/19) kalan.

Maske  ema hotu  konsentra  hodi selebra  kalan natal Kosok Oan Jesus Moris mai iha mundu, maibe   iha ema  balu organiza malu ho hanoin ladiak kontinua   halo sira nia asaun  kriminal  hodi  hasoru sidadaun sira.

Tuir  informasaun husi Polísia, vítima   nain rua ne’e mak Jesico Araújo    hetan sona  husi ema deskoñesidu iha  isin lolon parte kanosan liman karuk, iha  Kampung Baru  mais ou menus tuku 7 kalan oras Timor-Leste.

Enkuantu  vítima Basilio  Francisco de Lima Pinto hetan sona  iha  Golgota  iha parte kalilin ho tudik no  dadauk  vítima  nain rua hala’o hela  tratamentu  intensivu  iha  Hospital Nasionál Guido  Valadares (HNGV).

 Vítima Basilio  Francisco de Lima Pinto hateten,  iha akontesimentu ne’e nia koñese suspeitu ne’e.

“Tanba  ne’e ha’u hakarak prosesu kazu ne’e ba oin”,esplika  vítima Basílio  Francisco de Lima Pinto, ba  jornalista sira Kuarta (25/12/19) iha Hospital Nasionál Guido Valadares (HNGV)

Husi akontesimentu ne’e PNTL konsege  detein  ona suspeitu  ne’ebé mak sona vítima Basílio  Francisco de Lima Pinto iha Golgota.

Alende ne’e   Tersa (24/12/19) PNTL Eskuadra Dom Aleixo prende sasan kro’at  hanesan  rama ambon ida no samurai ida no tudik rua.

Evidensia sira asegura ona iha Eskuadra Polísia Dom Aleixo hodi submete ba  prosesu  investigasaun.