PNTL Aileu detein suspeitu kondus veíkulu soke mate ema

Komandante Operasaun Polísia munisípiu Aileu Inspetór Xefe Delfim da Silva hateten,  suspeitu ne’ebé mak  envolve iha asidente tráfegu hodi soke mate abitante ténki detein iha sela detensaun durante oras 72 hafoin submete ba primeiru interogatóriu iha tribunal.

“Kuandu suspeitu soke mate ona ema ita ténke asegura nia, tanba dala ruma ema ne’ebé mak vítima nia família senti nervozu bele halo fali asaun ba suspeitu ne’e. Depois  ita detein  ema ne’e iha sela tanba nia hanesan suspeitu, sira ne’e hotu ita la’o nivel koordenasaun ho Prokuradór sira husu orientasaun  tetu hotu seguransa. Tanba ne’e mak ita ténke detein  suspeitu ne’e ”,esplika  Komandante Operasaun Polísia munisípiu Aileu Inspetór Xefe Delfin da Silva, ba jornalista  Tersa (03/12/19),  hafoin lidera pasa revista ba veíkulu ne’ebé mak sirkula iha munisípiu refere.

Wainhira husu suspeitu hira mak detein iha sela? Komandante  resposta  katak, detein duni suspeitu, maibé nia la lembra númeru lolos.

Alende ne’e iha Sábadu (30/11/19), asidente tráfegu iha Praia dos Coqueiros munisípiu Díli involve suspeitu JVRSS, ne’ebé mak soke mate abitante nain rua Nonato Lopes núdar aman  no Jonathan  Borges  Lopes núdar oan mate iha fatin, maibé  PNTL  Díli  simu orientasaun  husi Ministériu  Públiku hodi aplika de’it Termu Identidade Rezidensia ba suspeitu.avi