Hetan krítika husi públiku, SEPS husu Migrasaun servisu ho disiplina

Sekretáriu Estadu Protesaun Sivíl (SEPS), Alexandrino Xavier de Araújo, husu ba  membru servisu Migrasaun Timor-Leste  atu servisu ho disiplina.

Alexandrino Xavier hato’o lia hirak ne’e liu husi nia diskursu  Segunda (13/01/20) iha seremonia  aniversáriu Servisu Migrasaun  ba dala 17, Segunda (13/01/20), iha Akademia Polísia, Comoro.

Ho aniversáriu   Migrasaun ne’e governante ne’e hato’o pararabens no husu  atu servisu ho disiplina.

“Ita  hatene buat balun  ita presiza hadia  husu nafatin ba diretór  jerál  komandante sira hotu  no membru Migrasaun sira hotu  husu nafatin imi nia komitmentu servisu ne’ebé mak imi hala’o tiha ona ho disiplina  hodi hatur     iha imi nia servisu fatin  hodi nune’e bele koresponde ba  ita nia Estadu”,esplika Sekretáriu Estadu Protesaun Sivil (SEPS) Alexandrino Xavier de Araújo, liu husi diskursu  iha aniversáriu  servisu Migrasaun Timor-Leste ba dala 17, iha Sentru Formasaun Polísia.

Diretór  Nasionál servisu Migrasaun Agustinho Gomes hateten,  seremonia aniversáriu Migrasaun ne’e hala’o ho simples tanba laiha orsamentu.

“Tanba  ne’e ami nia membru Migrasaun hala’o kontribuisaun orsamentu hodi realiza seremonia aniversariu ne’e”,dehan  Agustinho Gomes.

Nia akresenta kona-ba informasaun relatóriu servisu Migrasaun nian, tuir planu sei fó sai ba públiku iha Tersa (14/01/20), iha edifísiu Ministériu Interior, Villa-Verde, Díli.

Seremonia anversáriu ne’e, priense mós ho  atividade misa ne’ebé mak prezidi husi Amu Kapelaun Polísia Nasionál Timor-Leste (PNTL)  Nelinho Ferreira.avi