Migrasaun hatama osan millaun USD 3, 97.85 ba kofre Estadu

Diretór Nasionál Servisu Migrasaun  Superintendente Polísia Agostinho da Silva Gomes, hateten, durante tinan 2019, Migrasaun hatama reseitas  millaun USD 3,9785 ba kofre Estadu.

“Iha tinan 2019, husi atividade ne’ebé mak hala’o  konsege kolekta orsamentu hamutuk  tres milloens  noventa sete mil oitenta sinku dolar Amemrikanu”, esplika Diretór Nasionál Servisu Migrasaun  Superintendente Polísia Agostinho da Silva Gomes, ba  jornalista sira Kuarta (15/01/20) iha sala konferénsia imprensa Ministériu Interior Villa-Verde Díli.

Nia dehan, reseitas ne’e la efetivu, tanba  iha fulan Setembru governu  aplika  rezulusaun governu 2019  ba sidadaun Indonézia tama teritóriu Timor-Leste  tau  karimbu de’it laiha pagamentu.

“Ita mós aplika vistu  izensaun vistu ba  nasaun União Europea  hamutuk 28 países, tama teritóriu Timor-leste sem vistu sem pagamentu”,dehan Agostinho da Silva Gomes.

Alende ne’e Agostinho da Silva Gomes dehan,  iha tinan 2019, ema estranjeiru sira ne’ebé mak tama iha  iha Timor-Leste hamutuk 223.628.  Ema sira ne’e tama liu husi aeroportu, postu fronteira Salele, Motain, Sakato no Oessilo  iha Oecussi. No  ema sira  ne’ebé mak sai husi tritoriu Timor ba rai  liur hamutuk 222.559. Ema sira ne’e sai  husi aeroportu  internasionál Nicolau Lobato Comoro, Díli,  postu fronteira Salele, Motain, Sakato no Oessilo  iha Oecussi.

Kona-bá sidadaun   ne’ebé mak prolonga vistu iha tinan 2019  hamutuk ema 9.869  hodi kontinua permanénsia iha teritóriu Timor-Leste.

Alende ne’e adidu Migrasaun sira   ne’ebé mak koloka  iha embaisada no  konsuladu  iha estranjeiru  sira hasai  pareser  vistu  traballu ba ema  hamutuk 2.269.  Ne’ebé mak  nia adidu Migrasaun  koloka  iha Kupang, Bali-Indonézia, Singapura no seluk tan.

Alende adidu sira fó pareser ba vistu traballu, sira mós fó fiksaun rezidénsia  ba ema  hamutuk 326. No pareser  ba vistu edukasaun  ba sidadaun estranjeiru  ne’ebé mak  estuda iha Timor-Leste 47.

Nune’e mós Migrasaun fó vistu traballu ba traballadór  servisu  iha  Bayu Undan  hamutuk ema  258.

“ Ne’e  vistu  ne’ebé mak ita fó   ba ema  ne’ebé mak hatama aplikasaun  hodi mai servisu iha Bayu Undan”,dehan Agostinho da Silva Gomes.

Tuir nia, ema  ne’ebé mak prosesu hodi haruka fila ba sira nia nasaun ho voluntariumente hamutuk  61.  Ema  sira  ne’e husi sidadaun Indonézia, Repúblika Mali, Pakistaun, Kambodia  no India.

Agostinho da Silva Gomes, akresenta,  servisu Migrasaun konsege  rejista no   halo prosesu ba sidadaun estranjeiru   ne’ebé mak tama ilegalmente  iha Timor-Leste  hamutuk  nain 13 inklui nain 9 ne’ebé mak hala’o hela  prosesu  signifika iha  ema 22 ne’e ema ne’ebé mak tama teritóriu Timor laran ilegalmente.

Setór  operasaun mós aplika koimas tuir  lei Migrasaun artigu 144 ba kompañia sira  ne’ebé mak fó servisu ba sidadaun estranjeiru ho vistu  turizmu iha ema barak ho total  multa  ne’ebé mak hetan 46.500, no aplika mós ba pesoal  turista  ne’ebé mak uza sala  vistu turista  hodi hala’o servisu ou atividade profesionais  iha teritóriu Timor-Leste  iha tinan 2019 ho multa  USD 91.600.

Multa ba kompañia no pesoal ne’ebé mak kontra lei Migrasaun  ho total sentu trinta nove mil kinentus  vinte dolar  Amerikano. Prosesu espulsaun  ba  ema 12, depois Migrasaun halo kanselamentu ba vistu  ba ema  27.avi