Tinan 2019 MP rejista kazu krime hamutuk 4988

Prokurador Jeral Repúblika (PJR), José da Costa Ximenes hatete, durante tinan 2019, Ministériu Públiku  Rejista kazu krime hamutuk  4988, husi teritóriu nasionál.

 “Ministériu Públiku rejista kazu krime ho total 4988, ne’ebé rejista iha teritóriu nasionál  tomak,  iha Díli  ita rejistu 2788 prosesu, iha Baucau ita rejista 812 prosesu,  Suai 748  prosesu,  iha RAEOA ita rejista 391 prosesu, Gabinente Kombate Korupsaun no Kriminalidade Organizada, ita rejista 249 prosesu,  husi prosesu total ita konsege termina rihun 560 prosesu, redus 72 prosesu iha nível nasionál”, dehan José da Costa Ximenes ba Jornalista sira Kinta (16/01/2020), hafoin relata dadus kazu krime nian ba Prezidente Repúblika, Francisco Guterres Lú Olo, iha Palásiu Prezidensial Nicolau Lobato  Bairo Pité Díli.

José esklarese,  númeru ba kazu ne’ebé nia sita la inklui juglamentu sira ne’ebé kuadru ministériu públiku sira partisipa, primeru interogatóriu judisial sira ne’ebé  halo,  no mós  julgamentu sumáriu sira, esplika oituan gabinete komete korupsaun, no kriminalidade organizada 249 prosesu ne’ebé finaliza 219 prosesu.

“Ba kazu korupsaun lolos deit, 105 prosesu mak tama, krime organizadu tama  144, portantu total mak 219 mak tama ona, kazu korupsaun deit ita akuza 52 prosesu, krime organizadu ita akuza 93, kazu korupsaun deit ita arkiva tanba la iha provas ne’ebé  sufsiente ita arkiva 32 prosesu, portantu ho kazu krime organizadu sira seluk ita arkiva 38 prosesu” hatutan Jose.

Prokurador ne’e mós afirma, PJR sei fó informasaun ne’ebé detallu kona bá kazu prosesu hirak ne’e iha fulan Marsu, iha Parlamentu Nasionál.oly