Defende kazál Timor-Oan iha Indonézia, PJR : Governu mak iha kompetensia rekruta advogadu

Relasiona ho alegasaun ikus ba kazal Timor-Oan ne’ebé lori droga tama iha Atambua-Indonézia no Ministériu Públiku (MP) Indonézia, iha loron 3, fulan Marsu, tinan 2020, alega kazal ne’e ba tinan 17 no agora sei iha prosesu desizaun finál husi tribunál.

Ho nune’e, Prokuradór Jerál Repúblika (PJR), José da Costa Ximenes konfirma, MP labele reprezenta governu iha estranjeiru, maibé governu mak iha kompeténsia rekruta advogadu privadu, hodi defende kazal Timor-Oan ne’e.

“Governu loloos bele liu husi embaixada no mós governu rasik bele liu husi nia embaixada rekruta advogadu ida di’ak, para bele kontinua defende sira, ne’e alegasaun husi MP katak, 17 anus tribunál nia desizaun ita la hatene, dehan semana ida ne’e nia-laran karik sira deside ita la hatene. Ita bele la simu bele halo rekursu iha ne’ebá, maibé Ministériu Públiku (MP) labele reprezenta iha estranjeiru, liu-liu arguidu ita labele, iha ne’e karik ita mak akuza, entaun ne’e mak ha’u dehan governu mak tenke kontrata advogadu privadu ida para bele akompaña sira, defende sira, bele mós haree advogadu Timor-Oan di’ak ida hamutuk ho advogadu iha ne’ebá, para halo akompañamentu ba sira to’o desizaun tránzitu em julgadu”, PJR ne’e iha Paláçio Prezidencial, Bairo Píte, Díli (12-02-2020).

José sujere mós ba governu tenke halo akordu estradisaun ho governu Indonézia, tanba akordu extradisaun laiha, bele difikulta prosesu tribunál Timor-Leste ho tribunál Indonézia, wainhira akontese kazu boot ruma.

Kazal Timor-Oan ne’e, polísia Indonézia kaptura iha loron 29, fulan Maiu, tinan 2019, tanba lori droga ho típu Extase musan 4.874, hafoin servisu alfándega Atambua-Indonézia detekta husi aparellu X-Ray, iha fronteira Mota-Ain-Bobonaro. san