Grupu joven sira iha Hera ta’a no tuda Aman ho oan, hodi rezulta kanek todan. Husi akontesimentu ne’e, parte seguransa konsege detein ona suspeitu na’in 10.
Membru Servisu Informasaun Polísia Cristo-Rei no Konsellu Polísiamentu Komunitária (KPK) no hetan apoiu husi membru Komponente Naval F-FDTL konsege detein ona suspeitu hirak ne’e iha área Brimob Aldeia Mota Kiik, Suku Hera, Postu Administrativu Cristo-Rei, munisípiu Díli, Sabádu tuku 7 kalan oras Timor-Leste.
Vítima Manuel Gomes do Rosário haktuir kazu, ne’e akontese hafoin nia partisipa iha jogu futebool ho nia kolega sira, maibé derepente de’it hetan tuda husi grupu joven sira hodi rezulta kanek iha parte ulun.
“Ami joga hela bola, depois joven sira problema, entaun ami dehan ba kolega sira diak liu ita fahe malu de’it ona, depois mak joven sira tuda de’it ha’u. Ne’e mak ha’u halai ba kesar pai atu ba salva, maibé joven sira tá tan”,esplika Vítima Manuel Gomes do Rosário, ba GMN Domingu (16/02/20) iha Eskuadra Polísia Cristo-Rei, Díli.
Alénde ne’e vítima António Loina hanesan aman lamenta ho aktu joven sira nian, ne’ebé tuda kanek nia oan mane no tá kanek nia. Vítima António hakarak kazu ne’e prosesa ba oin.
“Antes ne’e problema ne’e ha’u iha tos, depois ha’u nia rian mai bolu ha’u iha tos-laran ba rian nia rejidensia hodi hadia ahi ne’ebé mak mate, depois hadia diak tiha, ha’u sai mai hasoru fali ha’u nia oan mane hakuak nia ulun dehan apa Mauleki ho nia ema sira tuda ha’u, ne’ebé ha’u ba atu husu tuir, tanba saída mak sira tuda ha’u nia oan, depois sira sai husi uma-laran langsung tá de’it ha’u ho katana, ne’ebé ha’u senti todan ha’u halai de’it”,dehan António Loina.
António Loina, katana ne’ebé mak suspeitu sira uza la’os katana ida de’it maibé katana rua.
Tuir António Loina, dehan suspeitu nain 10 ne’e deskonfia halo planu tenta atu oho nia ho nia oan mane Manuel Gomes do Rosário.
Vítma nain rua hala’o tratamentu ba sira nia kanek iha Hospital Nasionál Guida Valadares no hatoo ona keisa iha Eskuadra Polísia Cristo-Rey.
Tuir informasaun husi Polísia suspeitu sira ténki halo identifikasaun no loke prosesu investigasaun ba sira, tanba komete iha lei armas branka númeru 2017.
Suspeitu sira mós deskonfia involve iha eis grupu artemarsias ne’ebé mak taka ona husi governu.
Nune’e tuir informasaun husi Polísia suspeitu sira kontra kodigu penal artigu 188 asosiasaun kriminoza. 1 – Sé mak promove ka harii grupu, organizasaun ka asosiasaun ho finalidade ka atividade lori halo krime, sei kondena ho pena prizaun husi tinan 2 to’o 8. 2 – Konsidera hanesan grupu, organizasaun ka asosiasaun kriminoza agrupamentu hotu husi ema na’in-rua ka liu ne’ebé durante períodu tempu no hala’o didi’ak, lori ba prátika ka insita ba halo krime, ho neon atu hetan direta ka indireta benefísiu ka vantajen ida. 3 – Sé mak adere, apoia ka partisipa iha kualkér atividade sira husi grupu, organizasaun ka asosiasaun kriminoza sira nian, sei kondena ho pena prizaun tinan 2 to’o 6. 4 – Sé mak lori ulun ba grupu organizasaun ka asosiasaun sira ne’ebé temi tiha iha númeru sira anteriór sei kondena ho pena prizaun tinan 3 to’o 12. 5 – Pena sira ne’ebé temi tiha bele hakmaan hanesan baibain enkuantu bandu ka esforsa maka’as hodi bandu kontinuasaun grupu, organizasaun ka asosiasaun sira ka fó-hatene ba autoridade kona-ba sira nia ezisténsia atu nune’e bele evita halo krime.avi