F-FDTL nain rua la identifika virus korona

Xefe Saúde militar Majór  Guido  de Oliveira hateten, membru FALINTIL –Forsa Defeza Timor-Leste (F-FDTL) nain rua,  ne’ebé mak baisa iha sala ijolamentu Hospital Nasionál Guido Valadares la identifika sintoma virus korona.

Majór  Guido  de Oliveira esplika, membru F-FDTL  nain rua,  ne’e fila husi Huwan Cina mai Díli Timor-Leste  iha loron 17  fulan  Janeiru tinan ne’e, wainhira to’o  Instituisaun F-FDTL  haruka  kedas     membru  nain rua ne’e ba HNGV, hodi halo observasaun  ba sira nia saúde durante  loron 14  iha sala  izolamentu, maibé durante loron  14   nia laran la hatudu sintomas ruma  ne’ebé mak  ligadu ba  virus korona.

Tamba  ne’e, tuir planu membru ne’e sei alta  husi fatin izolamentu HNGV, iha loron ida fulan Fevereiru tinan ne’e, hodi fila-fali hamutuk ho nia familia hodi kontinua hala’o servisu

 “Militar    ne’ebé mak  fila husi nasaun Repúblika Popular Cina to’o iha Timor-Leste. Instituisaun permanénsia ho HNGV hodi emidiata haruka  membru   ne’e ba HNGV hodi hala’o observasaun  durante  loron 14 nia laran no durante loron 14 nia laran  la  hatudu sintomas ruma   ne’ebé mak ligadu  ho virus korona”, esplika Xefe Saúde Militar  Majór  Guido  de Oliveira, ba  jornalista sira Sesta (31/01/20), iha Kuartel Jenerál F-FDTL Fatuhada Díli.

No tuir informasaun husi F-FDTL, membru  forsa armada ne’ebé mak sei tuir formasaun iha Cina hamutuk  nain 17, maibé wainhira fila Timor-Leste sei haruka mós ba halo screening iha Hospital Nasionál Guido Valadares durante loron 14, hafoin haruka fila ba sira nia uma hamutuk ho sira nia familia   hodi kontinua hala’o servisu.

Alende  ne’e Xefe Redasaun  Jornal Independente Gaudêncio Marques  Figueiredo hateten, notisia  ne’ebé mak Jornal Independente hakerek hodi fó sai  iha públiku, bazeia ba faktus, ne’ebé mak Jornal Independente hetan iha terenu.

Xefe  Redasaun Jornal Independente ne’e akresenta, informasaun ne’ebé mak fó sai la’os atu halo povu  sai pániku,  maibé  fó atensaun ba iha Governu no entidade sira ne’ebé mak  iha  responsabilidade ba kestaun ida ne’e atu  prevene  virus korona tama iha Timor-Leste.

“Kestaun deskonfia kona-ba virus korona, ha’u hanoin normal  iha nasaun ne’ebé de’it  sé bainhira  nia fila husi nasaun ne’ebé mak  hetan ona virus korona  nia tenki suspeita, entaun nia tenki tama hotu iha prosesu teste médiku  hodi halo diagnostika ba ema  ne’e katak  ema  ne’e hetan duni moras ne’e ka lae?. Agora  ita haree fila-fali ba  kolega sira F-FDTL  sira mós suspeita. Tanba  ne’e mak ami hakerek  deskonfia, suspeita virus korona, ami la hateten membru ne’e hetan virus korona,  segundu nia ba  teste iha hospital,   depois nia tama duni fatin ijolamentu ida ne’e  faktu ida, ita deskonfia duni suspeita nia ba virus korona”,dehan Gaudêncio Marques  Figueiredo.

 Tamba ne’e  kestaun la’os de’it   husu diskulpa, maibé buat ida-buat ida média mak sala hela de’it.

“Sé karik sé mak senti ofendidu mai iha ami nia sala redasaun depois ami bele halo resposta, ita mós iha autóridade regulardór ida Konsellu Imprensa, ba iha ne’ebá hodi buka solusaun”,dehan Gaudêncio Marques  Figueiredo.

Xefe Redasaun Jornal Independente ne’e  akresenta, informasaun ne’ebé  mak fó sai la’os atu halo povu sai pániku, maibé atu fó atensaun ba povu atu prevene a’an husi virus  ne’e.

“ Informasaun ida ami fó  ne’e la’os atu fó paníku públiku, tenki hatene ida ne’e, ida ne’e hanesan warning  ba  iha públiku tomak para sira atu atensaun, liu-liu ba iha Governu no intidade sira ne’ebé mak  iha  responsabilidade ba kestaun ida ne’e”,dehan Gaudêncio Marques  Figueiredo.avi