Hakerek naran Xanana iha moru lolon, PNTL konsidera ajitasaun polítiku

Komandante Jerál Polísia Nasionál Timor-Leste (PNTL), konsidera ema ne’ebé mak hakerek maun Boot Kay Rala Xanana Gusmão, iha moru-lolon sira iha  kapital Díli laran, hanesan aktu ajitasaun polítiku.

Komisariu Faustino da Costa,fó ona orientasaun  atu halo operasaun no buka identifika aútor  ne’ebé mak hakerek naran maun Boot Kay Rala Xanana Gusmão, iha moru-lolon sira iha  capital Díli laran.

Naran sira  Maun Boot Kay Rala Xanana Gusmão ne’e hakerek iha moru lolon sira  iha área Colmera no   Aitarak-Laran besik lampu sinais Tránzitu no fatin sira seluk tan.

Ho naran maun boot Kay Rala Xanana Gusmão ne’ebé mak hakerek iha moru lolon  sira ne’e, halo públiku sai preokupa no  husu autoridade seguransa atu kontrola  hodi deskobre sé mak hakerek naran refere.

“Ha’u atu hateten ohin ajenda enkontru ba 9 oras, maibé como komandante nain rua  (Armando Monteiro no Euclides Belo) mai tarde  oituan  ita la autóriza tama partisipa enkontru ne’e,  mas orientasaun  ita fó  liu husi parte  operasaun  atu haree situasaun sira ne’e,  tanba bele konsidera mós parte   balun ba aktu ajitasaun”,esplika  Komandante Jerál PNTL Komisáriu  Faustino  da Costa, ba jornalista sira Segunda (17/02/20), iha Kuartel Jéral PNTL Díli.

Wainhira husu presiza atu hamos naran sira ne’e, Komisáriu Faustino da Costa responde, atu hamos, presiza  halo diskusaun.

 “Ha’u hanoin  que kuandu tau  naran Xanana iha ne’ebá sé mak atu hamrik atu ba hapus, entaun ténki liu husi diskusaun ida  parte relevante hodi haree ida ne’e”,dehan Faustino da Costa.avi