Lere: Líder istóriku sira mak bele hakotu impase polítikuc

Xefi Estadu Maior  Jeneral F-FDTL, Major Jeneral, Lere Anan Timur, hatete, líder istóriku sira hanesan, Kay Rala Xanana Gusmão,  Taur Matan Ruak, Marí Alkatiri, José Ramos Horta, no Francisco Guterres Lú Olo, mak bele hakotu impase polítiku rai-laran.

“Prezidente Repúblika husu ami nia opiniaun, no Prezidente nia pareser kona bá situasaun atual,  ba ami kompetensia tomak  ami dehan katak, iha Prezidente Repúblika, no ha’u hatete diálogu mak bele rezolve problema”, dehan Lere Anan Timur ba Jornalista sira, Sesta (07/02/2020) iha Palásiu  Prezidensial Nicolau Lobato Bairo Pité Díli, relasiona ho impase polítiku ne’ebé la’o ona ba tinan rua resin nia laran ne’e.

Lere klarifika, liafuan ne’ebé uluk nia ko’alia dehan, Prezidente Repúblika no Primeiru Ministru  tau kargu  iha gaveta, la’os katak halakon Estadu no halakon Governu, maibé atu buka konsensu hodi hakotu impase polítiku ne’e.

 “Ha’u nia klarifikasaun mak ida ne’e,  ha’u hakarak sira nain 3, Xanana  Gusmão, Taur Matan Ruak, Francisco Guterres Lú Olo, no líder istóriku Marí Alkatiri no José Ramos Horta, tu’ur hamutuk hetan konsensu, atu rezolve no ultrapasa impase polítiku ida ne’e, mas enkuantu laiha konsensu, ita bele halo buat hotu impase ne’e iha nafatin”,salienta Lere.

Lere hatutan, atu ba nasaun  nia diak no povu nia diak, tenke buka solusaun atu bele to’o konkluzaun ida hodi rezolve problema hanesan ne’e, maibé konsensu laiha, sei la rezolve problema.

“Balun ko’alia kona-ba eleisaun antesipada, buat ne’ebé ita promete uluk ita seidauk ezekuta, agora ba ko’alia tan saida? ita fiar katak, eleisaun antesipada laiha partidu ida mak  atu hetan maioria, úniku  konsensu entre líder sira, primeiru ami sira ne’ebé  mai husi ai-laran ne’e, Maun Xanana, Maun Taur, maun Lú Olo”, subliña Lere.

Nia akresenta,  líder istóriku na’in lima, na’in rua husi Frente Díplomátika, nain 3 husi Frente Interna no Frente Armada, sira na’in 5 ne’e nunka hanoin nasaun nia aat ka povu nia aat, sira hakarak nasaun no povu nia diak.

 “Ami preokupa, hanesan komandante no elementu, ami preokupa situasaun ida ne’e. Ba ha’u dehan katak, ha’u ladun preokupa ba situasuan polítika ne’ebé ita-nia líder sira jere, mas ne’e ita dehan katak konsekuensia,  oportunidade ida ne’ebé mak ema seluk  aproveita situasaun ida ne’e,  liu-liu sira oportunista sira mak aproveita oportunidade. Tanba ne’e ha’u garante katak,  F-FDTL sei marka nia pozisaun  nafatin nu’udar lutu ba nasaun”,tenik Lere.oly