Lino Saldanha hakotu iis tanba atake kardiaku

Komandante Unidade Polísia  Marítima Superintendente  Lino Saldanha iha Kinta (13/02/20), mais ou menus tuku  10 ho balun,  oras Timor-Leste hakotu iis, tanba atake kardiaku.

Tuir kronolojia   haktuir husi, família  Maria José da Silva iha  dadersan Komandante Lino Saldanha sei hala’o hela ezersísiu, iha nia rezidénsia iha Farol, derepente de’it,  komandante ne’e monu ba rai, família sira evakua ba iha Hospital Nasionál Guido Valadares (HNFV), ho kareta ambulánsia ba HNGV,maibe labele salva nia vida. No Familia lori ona mai iha matebian nia rezidénsia iha Faról Díli.

“Ha’u hatene nia iha moras duni, nia iha diabetes  ho korasaun, tanba momentu nia ba Austrália nia hetan duni moras korasaun, ne’e iha tinan 2018, depois nia halo tratamentu, entaun nia fila ami família atu buka ami nia nia inan nia uma, maibé Lino Saldanha la ba, ema hakarak nia prezensa, tanba ami feto de’it, ema hakarak nia (Lino) nia prezensa, maibé nia haruka de’it nia oan mane no oan feto ba hodi rezolve problema ne’e, depois ho ami nia tiu Viquque ba hotu, depois ami fila-fali mai nia ba iha uma huun ténki tau bua malus tuir lisan Timor nian, depois nia Lino  dehan ha’u iha Austrália ha’u han sala, ne’e mak ha’u hetan moras ne’e”,esplika  família Maria  José da Silva, ba GMN Kinta (13/02/20), iha Faról Díli.

Médiku Emerjensia, Todi de Jesus, hateten,   komandante Lino Saldanha hakotu iis antes  iha nia rezidénsia Farol Díli, hafoin transporta mai  emerjensia, dotor sira labele salva ona.

“Ami la konsege detekta nia fuan  ho sinaís vítais sira ne’ebé depois liu tiha  minutu 10 ami informa ba família sira  katak,  señor Lino Saldanha hakotu iis ona”,dehan Todi de Jesus.

Komanante Lino Saldanha moris iha  fulan Setembru, tinan 1971, oan husi António da Silva  Saldanha no Madelana Sousa.

Lino Saldanha  hetan moras fuan ne’e iha tinan 2018, wainhira ba partisipa formasaun ida iha Austrália, maibé  konsege  hala’o tratamentu no rekopera.

Lino Saldanha mós partisipa  masakre  Santa Kruz 12 Novembru  iha tinan 1991  hamutuk ho joven sira. Alénde ne’e  Lino Saldanha mós involve  iha kasai klanestina  hahú iha tinan 1994 too 1997.

Iha tempu ukun rasik a’an Lino Saldanha servisu núdar  tradutor iha misaun ONU nian iha Timor-Leste, nune’e iha tinan 2000, Lino Saldanha tama instituisaun PNTL  No komando PNTL fó fiar ba Lino Saldanha hodi komanda Unidade Polísia Marítima ho devisa Superintendente,  maibé iha Kinta (13/02/20), Lino Saldanha husik hela nia espoza   Eulalia   Braz  Carvalho da Silva no  oan nain hitu mak hanesan Emane boot   ho nia espoza inklui família sira tanba  atake kardiaku.avi