JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

MDI alerta ba sidadaun Xinés, kona vírus corona labele tama TL

MDI alerta ba sidadaun Xinés, kona vírus corona labele tama TL

Ministru Defeza no Interiór Interinu, Filomeno Paixão, alerta ba sidadaun Xinés sira ne’ebé kona moras aat liu-liu vírus corona labele tama Timor-Leste (TL). Maibe sira hirak ne’ebé livre husi moras ne’e bele tama.

 Ministru Defeza no Interiór Interinu, Filomeno Paixão, mos konsidera karta  ne’ebé mak  espalla iha media sosial katak, bandu sidadaun Xina tama Timor-Leste ne’e falsu.

Konteúudu husi karta ne’e,  relasiona ho vírus corona   ne’ebé mak akontese   iha sidade Wuhan-Xina, Orientasaun  Minsitériu  liu husi Diretór  Jerál  Servisu Migrasaun  orienta verbal mai  Xefe Pasaporte   Díli apartir  agora   ba oin  sei la autoriza  sidadaun Xina   ne’ebé   uza pasaporte   Xina labele tama Timor-Leste.

Karta   ne’e hetan asina husi Inspetor polísia  Ernesto Maia Xefe Postu Aeroportu. Karta  ne’e  públika iha loron  3 fulan ne’e iha media sosial.

Filomeno Paixão hateten, sidadaun Xina bele tama Timor-Leste, maibé ténke livre husi vírus corona. Sé wainhira  afeta vírus corona,  governu la autoriza.

“Ha’u nia ordem  la’os  ida  ne’e karik. Informasaun ne’e ha’u haree ne’e ladun los, ténkiser tama duni, deste que sira livre husi vírus corona”,esplika  Ministru Defeza no Interiór Interinu Filomeno Paixão, ba  jornalista sira Segunda (03/02/20) iha edifísiu Ministériu Interiór Matadoru, Díli.

Governante ne’e dehan, sé mak tama Timor-Leste, ténki livre husi  vírus corona, sé moras labele tama mai Timor.

“Tama mai ne’e  ita nia preparasaun fraku los ne’e, hanesan ohin iha Parlamentu imi rona ka lae?  Dehan ita nia  sasán (ekipamentu) iha Kinta foin mak tama”,dehan Filomeno Paixão.

Eis Brigadeiru Jeneral F-FDTL ne’e, husu  ba komunidade  atu labele pániku ho informasaun hirak ne’e.

 “Tanba  iha medida  ne’ebé  mak ami ba koalia tiha ona iha Parlamentu Nasionál,  medida  integrada  Ministériu Negósiu Estranjeiru no Ministériu Interiór  nomós Ministériu  Saúde”,dehan Filomeno Paixão.

Filomeno Paixão akresenta, ema sira mai  husi Xina prátikamente taka  hotu  ona, sé taka ona husi Singapura, Bali, husi Darwin nia atu mai husi ne’ebé.

“Ita  halo antisipasaun nia mai ténki lori karta alta estadu ida nia labele  moras”,dehan  Filomeno Paixão.

Vírus corona mosu  iha sidade Wuhan, Xina, ne’ebé mak hamate ona ema barak no afeta ona ba nasaun  21.

Governu seidauk fó orientasaun ba Citilink ho Sriwijaya

Reprezentante Aviaun Citilink, Fernando da Silva, hatete, to’o oras ne’e Citilink Airline ho Sriwijaya Air seidauk simu karta ofisiál no orientasaun ruma husi Governu Timor-Leste atu labele simu ka tula pasajeiru sidadaun Xinés sira husi rai-liur atu mai Timor-Leste.

“Iha semana 2 liu ba ami simu ona formuláriu husi Ministériu Saúde hodi fahe ba pasajeiru sira ne’ebé mai hosi Estranjeiru.Ha’u atu informa Citilink Airline presiza karta hosi Ministériu relevante konaba bainhira halo checking ka verifikasaun  hetan pasajeiru Xina labele simu”, afirma reprezentante Aviaun Citilink, Fernando da Silva, ba JN-Diário Segunda (03/02/2020) iha Timor Plaza, Díli.

Deklarasaun refere relasiona ho vírus corona ne’ebé mosu iha sidade Wuhan, provínsia Hubei, Xina, no oras ne’e espalla ona ba Nasaun balun hodi hamate ema atus 2 resin no ema ne’ebé afeitadu besik rihun 12, nune’e obriga Nasaun balun labele simu pasajeiru hosi sidadaun Xineza, maibé iha Timor-Leste to’o agora Citilink Airline no Sriwijaya Air, seidauk simu orientasaun hosi governu atu labele simu ka tula pasajeirus Xinés sira mai Timor.

Fernando da Silva hateten, aviaun Citilink simu ona orientasaun hosi parte Komandante Imigrasaun Aeroportu, maibé la’os hosi karta ofisiál hodi hatete, hahú hosi loron no fulan ida ne’e labele simu ona pasajeiru hosi Xina, maibé enkuantu simu tenke iha karta médíku ruma ne’ebé hatete pasajeiru sira ne’e la identifika afeta ba moras ne’e.

Lee hotu :   SIJK entrega apoiu ekipamentu prevensaun COVID-19 ba seguransa iha fronteira

“Ami sente ida ne’e la justu tanba orientasaun ne’e la’os hosi karta maibé liu hosi via telephone no media sosiál whatsap. Karik diak liu mak tenke liu hosi karta ofisiál  nune’e bainhira mai halo checking verifikasaun iha Denpasar tenke bazea ba karta, tanba sei laiha karta depois ami labele simu pasajeiru hosi Xina ikus ema krítika, ami sente ida ne’e diskriminasaun”, haklean nia.

Nia hatete, iha semana ida liu ba sira simu pasajeiru hosi Xina ne’ebé atu mai Timor, tanba sira iha karta médiku, inklui estudante Timor oan sira ne’ebé eskola iha Xina hamutuk nain tolu.

Iha fatin hanesan, Branch Manager Sriwijaya Air, Dirham Wahyudi hatete, iha sábadu foin lalais iha pasajeiru sidadaun Xineza hamutuk 25 atu mai Timor, maibé sira la konsege mai tanba sira hetan orientasaun hosi parte Imigrasaun katak, bandu sidadaun Xineza tama mai Timor.

“Maibé iha Domingu (2/2/2020) ami simu fali orientasaun hosi parte Komandante Imigrasaun Aeroportu Díli, konaba bele simu pasajeiru hosi Xina mai Timor, maibé importante pasajeiru refere tenke iha karta mediku, konaba pasajeiru  ho kondisaun diak”,afirma Branch Manager Sriwijaya Air.

Dirham Wahyudi subliña, iha Segunda (3/2/2020) sira fila-fali kontaktu hosi Komandante Imigrasaun Aeroportu katak, hahu segunda feira pasajeiru husi Xina labele tama ona mai Timor Leste.

“Ohin ami iha pasajeiru hamutuk 17,ne’ebé sira nia prosesu checking aviaun Sriwijaya sc 270 rute Denpasar mai Díli remata ona no sira iha ona sala espera, maibé tanba simu fali orientasaun katak, pasajeiru Xineza labele tama mai Timor Leste, ha’u kontaktu kedas ba Sriwijawa Denpasar, nune’e pasajeiru 17 hosi Xina evakua sai fali hosi sala espera no la konsege mai Díli,”esplika nia.

PN preokupadu ho kondisaun TL atu prevene vírus corona

Nune’e mos reprezentante povu sira iha Parlamentu Nasionál (PN), preokupadu maka’as ho kondisaun no ekipamentu Timor-Leste (TL) nian hodi halo prevensaun ba Vírus Corona ne’ebé espalla ona iha nasaun barak, hafoin mosu iha sidade Wuhan, Xina, iha fin tinan 2019.

Deputadu Abel Pires preokupa, tanba ekipamentu ne’ebé ekipa kontrolu uza hodi detekta passajeiru sira, ladun seguru no diferente tebes ho nasaun seluk nian ne’ebé metin no kompletu tebes, nune’e assegura ekipa nia vida.

“Ita iha Díli iha kapasidade ba halo teste ba ida ne’e ka la’e, bainhira iha ema ruma mak ita hanoin katak hetan moras ne’e, depois haruka sampel ba Darwin, ne’e ita tenke hatene iha kapasidade kalae, se laiha oinsa mak ita bele konfirma katak loron hira mak bele hatene moras ne’e. segundu kona-bá  oinsa ho ita nia pessoal saúde sira, ita tenke prepera sira nia kondisaun, nain hira mak hetan treinamentu agora dadauk ne’e, hanesan iha ita ko’alia dehan iha Aeroportu, Suai, no fatin-fatin sira ne’e, tanba dala ruma ita haree ita-nia pessoal saúde sira ne’e faru liman badak, hamnasa, no masker de’it mós la tau, kondisaun la adekuadu, ne’e risku ba sira duni, ne’e tenke iha preparasaun no treinamentu ne’eb’e dia’k ba sira, para la’os de’it proteze moras ne’e husi Timor, maibé proteze mós sira, tanba sira iha esforsu ne’e, ne’eduni tenke kuidadu sira, para sira mós bele koidadu ita, liga mós ba kondisaun, ekipamentu hira mak ita iha, tanba ita haree saída mak ita nia pessoal sa’ude sira uza ne’e ladun adekuadu hanesan iha Australia, Xina no seluktan, diferente teb-tebes, iha ne’ebá ema taka matan hotu, ita-nia ha’u haree iha media, sira kondisaun ne’e ladun adekuadu, entaun ita tenke hatene ekipamentu hira mak ita iha, espesialmente esforsu atu kombate vírus ne’e”, tenik deputadu PLP ne’e.

Lee hotu :   PNTL bandu lori atributu partidu simu Xanana

Aleinde ne’e, Abel mós preokupa kona-bá kapasidade fatin izolamentu atu acumula pasiente sira ne’ebé afeista vírus refere.

“Kona-bá sala izolamentu, agora dadauk ne’e sala izolamentu hira mak ita iha,  kapasidade atu akumula pasienste hira, ne’e ita tenke hatene,

Depois Aeroportu ho sala izolamentu ne’e tenke iha transporte, ita iha ambulânsia multi funsaun hira, hodi transporta pasiente iha fatin ne’ebé mak detekta hodi ba fatin izolamentu, karik ita iha kapasidade atu handle  biuat sira hanesan ne’e, hetan treinamentu ruma kona-bá halo operasaun ka seidauk, nain hira mak preparadu ona,

Tanba se ita ko’alia aktu aktu de’it, la’e, maibe ita presiza hatene saída mak ita iha hodi halo prevensaun.”kestiona Pires.

Deputadu PD, António da Conceição mós sujere, atu governu sensibiliza informasaun ho lalais no ho másimu, nune’e populasaun hotu iha Timor-Leste hatene no antisipa, inklui koidade aan husi moras refere.

“ Ita presiza kampaña sensibilizasaun ne’e ba ita nia populasaun, tanba ita Timor ne’e buat ida falta mak informasaun, Se populasaun ne’e informadu di’ak kona-bá oinsa mak hetan moras ida ne’e, ema bele prevene, ita labele proekupa liu sira ne’ebé tama mai, tanba ita laiha voo direitu, maibe oinsa mak karik sira ruma ne’ebé mak iha ne’e tiha ona, se karik kontaminadu mós ho moras ida ne’e, ita nia sensibilizasaun ka kampaña ne’e mak importante tebes, hodi nune’e ita bele prevene moras ne’e, liu-liu iha kapítal hanesan ita nia iha Díli ne’e, depois mós fronteira sira ne’e, Agora tenke intensiva informasaun liuhosi meius hotu, atu nune’e oinsa moras refere labele espalla iha ita nia nansaun,”tenik xefe bankada PD ne’e.

Hatán ba asuntu ne’e, Ministra Saúde interina, Elia dos Reis Amaral hateten, kona-bá informasaun, MS koordena ona ho parte hotu, hodi fahe informasaun ba públiku ho regular kada loron, inklui kona-bá sala izolamentu, MS mós prepara ona iha HNGV inklui iha sentru saúde Formoza rasik.

“ Fatin izolamentu ami prepara ona, iha HNGV no iha sentru saúder Formoza rasik, inklui pontu entrada sira, ami sei tau tenda ho kontentor, ami mós prepara fatin iha ospitál tuan Lahane, karik iha suspeitu ruma.

Ami mós prepara ona komisaun surtu hodi halo prevensaun, ami mós treina ona 65 pessoal de saúde, inklui pessoal ambulânsia, husi mós ospitál referal sira bem treinadu, HNGV mós iha ekipa kompostu husi lina 6 ne’ebé importante loos, hanesan kontrolu moras, unidader emerjensia HNGV, no unidade laboratiun nasionál, no mós ba iha organizasaun saúde mundial, no ita koloka mós brigada saúde Xineza nian,”informa Elia.

Dadaun ne’e,  iha ema na’in 360 resin mak mate ona, no iha ema  rihun 17 liu mak afeitadu ona husi vírus refere.

Corona vírus ne’e mós espalla to’o ona nasaun europa no ázia, tanba iha transmisaun ho lalais liu, liuhosi iis.

TL sei seguru husi Corona vírus

Ministru Negósiu Estranjeiru no Kooperasaun (MNEK), Dionísio Babo Soares, deklara, Timor-Leste (TL) maske la’os buat hotu kontroladu, maibé  seguru husi vírus corona, tanba laiha voo direta husi Xina mai TL, liu-liu tanba nasaun ne’ebé transfere pasajeiru husi Xina, hanesan Singapura no Indonézia rasik bandu ona pasajeiru husi Xina, liu-liu xineza rasik atu tama iha fronteira.

“País hotu-hotu liu-liu sira ne’ebé besik iha Xina, hola medidas rigorozu no rutinitas, hanesan Singapura suspende hotu ona atividades hotu-hotu ho Xina, Australia suspende vó hotu-hotu ne’ebé mak mai husi Xina, labele tama ba Australia, Indonézia mós bandu ona ema Xina atu labele tama, Filipinas mós hanesan, inklui Rusia, Amérika no kuaze país barak iha mundu ne’e. Ita Timor-Leste laiha vó direitu husi Xina, laiha kontaktu direitu husi Xina, liu husi aero ka via terrestre, tanba ne’e, medidas de kontrolu ne’ebé akontese, iha paízes ne’ebé besik ita, hanesan aeroportu saída no no entrada ba itania país, signifika katak, la’os buat hotu kontroladu, maibé iha segundu nível ba risku, iha país sira iha mundu,” informa Ministru Dionísio iha plenária, bainhira debate ho deputadu sira iha PN, Segunda (03/02/2020).

Lee hotu :   Konfrontu iha Mascarinhas, Janela eskola UNDIL nian rahun inklui uma abitante ida

Nune’e, Ministra saúde interina, Elia dos Reis Amaral esplika, vírus refere mosu, tanba xineza sira konsumu ai-han ne’ebé mak ladun tasak, inklui naan ne’ebé mak husi animal hanesan niki samea no laho rasik.

 “Vírus ne’e mai husi animal ne’ebé ita konsumu, liu-liu hanesan ema Xina sira konsumu ai-han ne’ebé mak ladun tasak, liu nann husi animal ne’ebé selvazen,  kobra, retíl, domíniu liu hanesan niki sira ne’ebé mak sai kauza prinsipal ou kauza temporariamente ba iha vírus corona ne’e rasik. No detekta husi pasiente ida ne’ebé mak mear no isin manas maka’as, hafoin ne’e mak matenek na’in sira deklara katak iha vírus foun, maibe momento ne’e sei iha faze nasionál de’it, depois ne’e mak afeita ba global, maske transmisaun vírus ne’e husi animal, maibé liu mós husi aero, depois aero ne’e la’os depende ba temperatura, maibe depende ba ita nia sistema imunoloji, tanba ne’e, ida ne’ebé risku liu, hanenan ema ho idade ne’ebé liu husi 50, ou ba labarik sira, inklui inan isin rua, ou ba maluk sira ne’ebé mak halo hela tratamentu ba moras sira. Vírus refere nia faze okupasaun ne’e, husi loron 1 to’o 14, ida ne’e mak ita presiza tau atensaun”, haktuir governante ne’e.

Elia haktuir, MS fahe informasaun regular ba públiku kada loron, inklui embaixador no ajensia nasoens unidas sira, ho modelu prevensaun hanesan buletim ida, antes semana rua, MS mós enkontru ona oinsa haree passajeiru sira ne’ebé tama sai.

“Ami koloka pessoal sira ne’ebé bem treinadu, MS mós ativa ona, kompostu husi ekipa komisaun surtu nian, hanesan ekipa emerjensia nian, ekipa laboratóriu nasionál, no mós ekipa médika xineza nian, nune’e bele asesu iha komunikasaun, bainhira passajeirus ne’ebé tama ho lian xina. Ami mós halo enkontru regula, no kria mós grupu wp, para oinsa update informasaun ba malu, liu-liu parte imigrasaun nian oinsa mak kontrolu ba nasaun liur sira, liu-liu atu haree passajeirus sira ne’ebé tama, liu-liu husi Xinan Wuhan nian, bele mós passa informasaun katak, sira labele tama lai, tanba ne’e, antes tama mai ita kontrola kedas iha imigrasaun, ministériu saúde mós koloka ona pessoal saúde iha portaun entradas sira ne’e, no oinsa atu prepara tan tenda ruma iha entradas sira hodi halo fatin izolamentu, baihira deskonfia iha sintomas ba vírus, MS mós koloka termómetru ba iha fronteira terrestre sira,  nune’e bele tau atensaun”, relata governante ne’e ba deputadu sira iha PN.

Corona vírus ne’e, deskonfia, mosu iha loron 31 fulan Dezembru tinan 2019, iha sidade Wuhan Xina, ne’ebé konsege espalla ona ba nasaun sira iha Europa no Azia balun, tanba vírus refere da’et ho lalais.

Vírus ne’ebé ho nia sintoma hanesan, mear, isin manas, no halo dada iis ladi’ak. konsege afeita ona ba ema rihun 17 liu mak sofre no atus tolu resin mak mate ona.avi/fel/Say

 

Add to Comments Here!!!!

error: Content is protected.
Secured By miniOrange
You might also like:
Konfrontu iha Laga, rezulta ema nain haat kanek todan ■PNTL detein ona autór prinisipál

Konfrontu iha postu administrativu Laga entre ...

Veteranu sira husu PR Lú Olo hakotu impase polítiku ho imparsial

Prezidente Konsellu Veteranu Kombatente Libertasaun Nasional,...

Fundu petrolíferu sa’e ba biliaun USD 17,69

Relatóriu Banco Central de Timor-Leste (BCTL),...

Close