PR apela ba GAM tenke kumpri lei arma branka

Prezidente Repúblika (PR), Francisco Guterres Lú Olo, hatete, maske governu revoga ona rezolusaun númeru 16/2013, hodi   reativa Grupu Arte Marsial sira (GAM), maibé Grupu Arte Marsial sira ne’e  tenke kumpri lei númeru 5/2017, kona bá  prátika arte marsiál no rituál sira.

“Reativa Artemarsiais liu husi lei ne’ebé mak iha, númeru 5 ne’ebé mak iha ita hakarak atu haree, para artemarsiais sira ne’e hanesan organizasaun desportiva, prontu ne’e la’o tuir dalan lei ninian, para sira bele partisipa iha desportu”, dehan Xefe Estadu ba Jornalista sira iha Salaun Ministériu Finansas  Aitarak Laran Díli, Segunda (24/02/2020).

Xefe Estadu hatutan, Governu tenke kria lei ida antes reativa artemarsiais, bazeia ba  kompromísu polítiku ne’ebé partidu polítiku  hotu hato’o durante kampaña eleitoral.

“Hodibainhira lori fali rezolusaun ida maka taka tiha fali lei, rezolusaun laiha forsa ba lei, tanba ne’e duni governu agora loke fila-fali dalan ba lei ida ne’e para artemarsial sira bele reativa”, subliña Lú Olo.

Alende ne’e, Prezidente Repúblika husu ba joven sira ne’ebé involve iha GAM, tenke la’o tuir nafatin lei ne’ebé governu husik nakloke hela ona, atu hala’o desportu ida ne’e hanesan Timor-oan, hanesan organizasaun desportiva ba Timor-Leste nian.oly