Sona kanek estudante Finantil, PNTL detein ona suspeitu na’in 22

Polísia Nasionál Timor-Leste (PNTL) Eskuadra Dom Aleixo detein estudante 10 Dezembru na’in 22, tanba deskonfia  sona kanek estudante nain tolu husi Finantil iha Rotunda Lafatik.

Tuir  informasaun husi Polísia, Kazu tentativa  ne’e akontese  Tersa(25/02/20) iha área Rotunda Komoro, mais ou menus tuku 1 liu minutu 30,  wainhira estudante   sira  husi Finantil atu ba eskola, maibé hetan asaltu husi estudante 10 Dezembru hodi sona kanek ema  nain tolu husi Finantil nian.

Vítima nain tolu  ne’ebé mak hetan kanek Alemeiro  António  hetan sona iha parte kabun,  no Jacob  da Costa sona iha parte kotuk-laran,  Basílio Barreto sona  iha parte kabaas.

Hafoin sona kanek tiha estudante  nain tolu ne’e, estudante 10 de Dezembru balun kontinua hala’o pasarevista ba iha kareta sira  ne’ebé mak deskonfia tula estudante Finantil nian.

Maibé hetan intervensaun husi PNTL Eskuadra Dom Aleixo hodi halo kapturasaun ba estudante 10 Dezembru 22 lori ba detein iha sala detensaun PNTL munisípiu Díli hodi kumpri oras 72 hafoin  submete ba primeiru interogátoriu iha Trbunal Distritál Díli

Husi estudante 22, iha  nain tolu idade minonarida, tanba ne’e PNTL hasai fali  husi sela detensaun hodi halo identifikasaun ba sira nia sertidaun batismu, los duni ka lae sira idade minoridade.

Vítima sira hala’o  ona tratamentu  iha Hospital Nasionál Guido Valadares (HNGV).

Suspeitu sira ne’e deskonfia involve iha   grupu artemarsiál balun ne’ebé mak  governu liu husi reniaun Konsellu Ministru reativa foin lalais ne’e.avi