Alfándega sai risku krime iha TL, José: Konkorda ho lamentasaun husi PJR

Alfándega konkorda ho lamentasaun Prokurador Jeral da Repúblika (PJR), ne’ebé kestiona servisu alfándega ni’an durante ne’e, katak Alfándega mak sai risku ba krime iha Timor-Leste (TL).

“Alfándega ita bele hateten katak área ida ne’ebé mak risku bo’ot maibé lo’os duni Prokurador Jeral Republika kestiona ne’e lo’os ha’u mós apoiu, ha’u mós konkorda tanba alfándega hanesan área risku bo’ot, atu krime sira atividade ilegais barak bele akontese iha ne’e, tanba ne’e mak ministériu finansas liu husi prosesu reforma ne’e tenta atu hadia, atu hadia klaru ke prejiza halo investimentu ba sistema investimentu ba rekursu humanu no mós finanseiru sira atu bele suporta bele fortifika instituisaun alfándega para bele halo kontrolu”, dehan, Diretór Jeral Autoridade Alfándega, José António Fátima Abílio, ba GMN iha nia knar fatin Palasiu Governu, Tersa (10/03/2020).

Diretór Jeral ne’e, garante serbisu alfándega ni’an ba futuru sei hadia di’ak liu tan no sei asegura no mantein halo kontrolu ba sasan hirak ne’ebé mak tama no sai liu husi pontu entrada sira inklui pasazeiru sira.

José António esplika liutan, serbisu ne’ebé mak durante ne’e alfándega hala’o, konsege prende sasan ilegal sira, hanesan kombustivel, serveja, material konstrusaun no seluk tan.

Kona-ba sasan hirak ne’ebé mak parte alfándega prende durante ne’e, iha kazu balun halo ona partisipasaun administrativa no mós kazu balun mós haruka ona ba ministériu públiku hodi halo prosesu investigasaun tuir dalan legal.

Antes ne’e, Prokurador Jeral Repúblika (PJR), José Ximenes kestiona alfándega ni’an servisu, hafoin hasoru malu ho Prezidente Repúblika (PR), Francisco Guteres Lu-Olo, iha Palasiu Prezidensial Nicolau Lobato, Bairo-pite, Segunda (09/03/2020).Ina