Deskonfia riska tun-sa’e bandeira RDTL, PNTL detein ona feto rua

Polísia Nasionál Timor Leste (PNTL) detein  ona feto nai’in rua tanba  deskonfia  riska tun-sa’e bandeira nasionál  RDTL ho  naran oin-oin.

Ema  nain rua  ne’e  ida  sidadaun Korea do Sul  ho inisiál JL no Timor-oan ADP  ne’ebé mak PNTL detein Sesta  (27/2/2020), iha Padaria  Portugal Timor-Plaza,  mais  ou menus tuku 4 lorokraik  oras Timor-Leste.

Sidadaun  nai’n rua submete  ona ba prosesu  investigasaun iha Eskuadra Polísia Dom Aleixo munísipiu Díli.

Bandeira RDTL ne’e haree husi  sasin Jacinto Sousa Guterres, wainhira nia ba hemu kafé iha Timor Plaza.

  “Ha’u sente  nu’udar Timor-oan ita haree ema  rihun atus hira mak ran fakar ba bandeira  ne’e, entaun ha’u atu asegura uluk bandeira ne’e ha’u hateke tuun sa’e Polísia laiha, entaun ha’u bolu uluk kolega seguransa sivil nai’n rua  imi na’in rua ida hein ida ba  bolu Polísia maibé ha’u hein kle’ur ha’u kontaktu komandante Polísia  señor Armando ha’u dehan ha’u asesor iha Autoridade iha Prezidente Autoridade munípiu Díli  que  ha’u hetan bandeira nasionál hakerek husi ema  nai’n rua ida Timor oan no ida ema estranjeiru. Ha’u la’os ema funu nai’n, maibé  ha’u sai sasin ba funu tanba  bandeira ida ne’e, tanba  ne’e mak ha’u kontaktu diretamente  ba komandante”,esplika Jacinto Sousa Guterres, ba jornalista sira  Sesta (28/02//20) iha Eskuadra Polísia Dom Aleixo.

Bandeira  ne’e nia naruk  192 no luan   metru 98,  no evidensia asegura ona iha PNTL  hodi submete ba  prosesu investigasaun.

Tuir informasaun husi suspeitu JL bandeira ne’e hakerek ema sira nia naran,  hanesan rekordasaun ida  atu lori ba Korea do Sul, maibé PNTL konsidera aktu  ne’e krime.avi